2021年4月5日星期一

英仔小賣部:村校小賣部

無波踢,就唯有繼續行吓山,今次喺人強馬壯嘅組合,所以,一於途程行長啲,由烏蛟騰起步,經亞媽笏、梅子林、荔枝窩、印洲塘海岸公園、三椏村、苗三石澗,到九擔租離開,行吓抖吓,抖吓打吓卡,結果都行咗成5個鐘。我哋各自都帶備乾糧,不過,行到中段到咗荔枝窩,就晌荔枝窩村嘅廣場旁,有一間村校「小瀛學校」,每逢周六、日、假期,門外開咗檔「英仔小賣部」。 
我哋喺「自由行」,無人導賞,不過,幫襯「英仔小賣部」時,英姐(我估店主阿姐喺叫「英姐」啩,「英仔」用嚟搞笑啫)就做咗我哋嘅聲演導航,不停介紹荔枝窩歷史。佢話,好多村民已經移晒民,散居世界各地,但近年荔枝窩搞復耕,又搞保育(廣場側就有間荔枝窩地質教育中心),好多村民都響應而回流返嚟,就好似英姐,佢話佢自己就喺晌德國返嚟嘅,搞呢檔小賣部,賣專長嘅客家茶粿,並兼營一啲地道小食。
唔喺講笑,啲茶粿全部都喺新鮮製作,一盆又一盆嘅新鮮出爐,賣完就無。口味主要有4款:蘿蔔、雞屎藤、眉豆及菜脯。
bowl菜脯茶棵 $10
因為蒸起無耐,拎上手仲喺熱辣辣,故此,外皮軟熟煙糯,好有韌性,但咬落卻一點都唔黏牙,雖然色澤喺墨綠色,不過食唔出有啲咩味;而內餡嘅菜脯就十分鹹香惹味,仲有少少爽脆感,果然喺好手勢。
由於喺有街渡可由馬料水或沙頭角(需禁區紙)直接過嚟,所以,英姐話一到假期就好多人入嚟,亦希望搞番旺啲,等多啲人認識吓呢一條有幾百年歷史嘅客家圍村。

個人評分
味道:9/10
環境:7/10
服務:7/10
抵食:9/10
平均每人消費:HK$10

餐廳資料:
英仔小賣部
粉嶺沙頭角荔枝窩小瀛學校

沒有留言:

發佈留言