山區裡的走走趯趯: 阿爺燒鵝餐室 Roast Goose Restaurant：鵝油撈粗

2021年2月21日星期日

阿爺燒鵝餐室 Roast Goose Restaurant：鵝油撈粗

今日約咗朋友行上獅子山，由大圍出發，直接行上「紅梅谷」起步，由於今日嘅拍檔都喺行山好手，所以，一股作氣上到獅頭，比預計嘅時間快。起步前就約埋一齊先食個晏，揀咗「阿爺燒鵝餐室」，因為老友推介佢哋嘅鵝油撈麵。

門面有啲似中菜館，但入到去其實同茶記差唔多，左右兩邊喺卡位，中間就一張張4人枱，餐廳尾牆上印有個大大隻「阿爺」嘅招牌，此外，裝修都喺走簡約路線，最緊要喺地方乾淨企理。

仲唔喺茶記模式，所有餐具、紙巾、調味包就放晒晌枱下嘅橫拉櫃桶，比起就咁放晌枱面衛生啲。

短短半個鐘頭嘅用餐，見到唔少街坊幫襯，翻枱轉數都幾快、幾密。食物方面，除晌茶記常見嘅常餐、特餐、一人餐、二人餐……等等之外，其餘嘅就哋碟頭飯，不過，就以自家製燒味作唔同組合。

仲有一款超值套餐，包小食、主食、蔬菜及餐飲，只喺$58，真喺好划算。但一心一意嚟食燒鵝，但呢個餐無得揀，所以，就選番另外啲碟頭嘢。

阿爺燒鵝火腩仔雙拼飯 $62

老友要「浪漫」，所以，揀咗燒鵝拼火腩仔，由於一陣食完就起步，故此改為少飯，嚟到嘅碟頭真喺餸多過飯。燒鵝嘅味道等陣由我分享，但佢話啲燒腩仔真心唔錯，切成細細嚿，一口一嚿啱啱好，肥瘦相間得嚟，又唔會太多見膏，鹹香而鬆化，外皮仲喺卜卜脆。

阿爺燒鵝叉燒雙拼鵝油撈麵 $72

小弟就揀咗叉燒拼燒鵝，如一般麵店咁，嗌撈麵都會奉送一碗清湯，但呢碗絕對唔喺清湯，雖然唔知喺乜，但濃而不濁。先試啲燒味，叉燒唔太肥，啱我，既有蜜糖香，又加少少濃邊，好食。燒鵝果然喺主打，外皮有光澤，咬落皮脆肉嫩，仲帶點點煙燻感嘅油香，沾點酸梅醬，令燒鵝食起嚟更有風味。蠔油撈麵食得多，鵝油撈麵就第一次，麵條撈咗鵝油，出奇地唔覺話好「油淋淋」，反而，又真哋香咗好多，聽人講話鵝油有益，真喺未查證過，唔知堅定流。