2021年2月9日星期二

蜜滋麻美 Mizimamei:「滋」足常樂

雖然本身都鍾意飲啲台式茶飲,尤其珍珠鮮奶茶、花果茶,但就真喺好少專登去幫襯啲茶飲專門店,大多數都喺堂食開就飲番杯。今次仲專登走到晌大斜路之上嘅「蜜滋麻美」,都喺朋友超極力推介,叫我試試呢間台中過江龍。
食完午飯行過嚟,出奇地無乜人喎,可能位置有啲吊腳,亦可能今日有少少天雨,總之,無人排我就唔使等,快手買完返公司慢慢嘆。茶飲專門店都喺以外帶為主,但「蜜滋麻美」店內環境比下面幾間近皇后大道嘅茶飲店大,同樣以簡約裝修為主。
飲品選項上,大類分為手工黑糖珍珠、頂級手採茶及現磨手工豆漿,定價都好合理,餐牌中打了星星符號的是店長推介。並可以額外加配料,冰度與甜度亦有選擇,而且,店內所有飲品都可製成熱飲。
晌收銀櫃枱旁,仲有兩張提示卡,一張喺特別介紹到飲用黑糖產品時嘅飲用秘訣。
而另一張則介紹佢哋嘅出品會帶嚟5層嘅豐富口感,個人就覺得有少少誇張啫,哈哈。
bowl阿美黑糖珍珠奶茶($29)
小弟就揀咗推介之一嘅「阿美黑糖珍珠奶茶」,寫明可以免費加花生、芝麻、花芝或珍珠,芝麻就最得小弟歡心。睇住師傅晌後面製作,再到枱前加芝麻,嘩!勁呀,倒芝麻一啲都無手緊。
跟細杯只喺相差$4,但就大杯好多,而且,睇都睇得到底下有好多珍珠,拎到返公司啲黑糖都沉晒底。而我就無話特別咩飲法,都喺搞番勻去飲,啜一啖先,奶茶嘅味道唔錯,頗醇香,滲出微微黑糖香,混咗啲芝麻後,有點微微粒粒感,加上多添幾分芝麻香,感覺頗有趣,而啲珍珠煮得夠透,煙韌QQ,確實落嘅份量亦多,整杯嘢真材實料,抵飲。
做人學會知足常樂都好重要,否則,你就會睇咩事都覺得唔滿意、唔順眼,有個朋友,本身做工程師,講緊月薪有7、8萬,就喺唔知足,想食大茶飯,自己搞工程,結果就債台高築!

個人評分
味道:8/10
環境:6/10
服務:7/10
抵食:8/10
平均每人消費:HK$29

餐廳資料:
蜜滋麻美  Mizimamei
中環鴨巴甸街16A號地下
9289 7864

沒有留言:

發佈留言