小安南越南河粉 Petit Annam Pho：值得「安」哥

之前一篇「張記士多」嘅食評，就講到第一次跟姨仔，加埋佢朋友一齊行山，由粉嶺行到去大埔，響水塘起步，再經鶴藪水塘、沙螺洞、鳳園，搭小巴出番去太和。午餐就帶咗啲乾糧中途食，而去到沙螺洞時又晌「張記士多」攤抖吓兼食碗山水豆腐花，過到嚟太和，都將近4:00pm，返到屋企都接近傍晚，行到攰都費事煮，就索性晌太和食個早早早鳥晚餐。姨仔查一查，就揀咗「小安南」，啱啦，食啲濕濕哋嘅越南粉就最好。 

雖然喺呢啲吊腳時間，但又唔喺無乜客喎。室內環境裝修簡約，以淺墨綠為主色調，兩邊牆都貼有歐式花階磚，並掛上少少食物相作點綴。防疫關係，都喺要二人一枱，不過，啲間隔膠板只喺普通大細，基本上跟四人一枱都無咩分別。

餐牌有兩大頁，過晒膠有啲反光，泊上牆嚟影。類別包括越式湯粉、越式撈檬、小食及各款飲品。店家更強調店內嘅越式湯底均採用鮮雞、香料熬製，並堅持唔加味精及雞粉，其實，依家都相對好少餐廳仲用緊味精。

除咗餐牌上嘅湯檬、撈檬，入鋪前門口仲棟咗個牌，提供幾款假日飯餐，想食飯嘅朋友都有少少選擇。

基本上，佢哋無套餐供應，不過，飲品及個別小食有加配優惠，變相自製套餐。而姨仔同佢朋友一枱，我哋兩枱人就各自嗌。

雞絲湯檬 $42

上文都提及過店家嘅湯底均採用鮮雞熬製，飲落確喺好有鮮甜，而且，唔會飲完有種好口渴嘅感覺。啲雞絲嘅份量都唔少，亦都好嫩口，仲伴有蘿蔔、紫洋蔥及芽菜作配料，而檬粉口感爽滑，整體而言，的確喺有質素。

蜜糖柚子紅茶 +$12

老婆一向都頗喜歡柚子茶，所以，揀呢款蜜糖柚子紅茶，入口暖粒粒，而柚子味突出，襯紅茶，感覺都幾夾。

半生熟牛肉河粉 $58

小弟就試試佢哋嘅牛肉，因為餐牌標明用肩胛位，當然會嫩滑好多。的確，當牛河送到嚟時，牛肉色澤相當粉嫩，睇落都覺得好腍滑，先試為快，入口肉質果然好嫩滑，卻不失肉香；而河粉好滑溜，配合埋濃而不濁嘅牛骨湯，真心好食。

小安南奶茶 +$8

越式咖啡都叫試過唔少，但越式奶茶，印象真喺無試過。正幻想感覺喺點時，飲一口，感覺跟一般奶茶差唔多，但慢慢會滲出點點香料味，似八角、似玉桂……定喺啲乜，總之就多咗朕香料香，感覺幾有趣。

一來呢餐「晚飯」食得早，行山途中又已經食咗啲麵包及豆腐花，二來兩碗粉嘅份量都好十足，所以，我哋都無額外加配小食。整體都食得出店家都用心製作，招呼亦唔錯，值得再幫襯嘅小店。

個人評分
味道：8/10
環境：7/10
服務：8/10
抵食：8/10
平均每人消費：HK$60

餐廳資料：
小安南越南河粉 Petit Annam Pho
大埔舊墟直街30號美利大廈地下10號舖
9876 6986