餐廳晌祈德尊新邨入面嘅平台，位置確喺幾隱秘，可以兜7仔旁後樓梯上，亦可以兜正門搭扶手電梯上平台。雖然叫茶餐廳，但門面已好有個性，有啲似日式西餐廳，絕對唔多似茶記。入到去，又如一般茶記咁有嘅卡位，但亦有啲少少格調嘅圓木枱配皮椅。除門面有啲似日式西餐廳風格外，裡面有啲牆上餐牌都以啲日本書法字去寫，究竟老細喺唔喺「哈日族」呢？
老友提我，記得試佢哋啲包，因為所有麵包都喺自家製，近門口位，仲擺咗好多麵包出嚟，喺作零售之用。
下午茶時段有啲咩揀呢？底面兩頁嘅下午茶餐餐牌，都有好多選擇，少少哋嘅輕食，如多士、三文治、炸脾、西多……等等，大份量啲嘅就有拉麵、米線、炒粉飯麵碟頭嘢……等等，最估唔到，甚至乎窩芙、梳乎理班戟都有，以茶記而言，真喺超強嘅下午茶選項。除選擇多，定價亦相宜，怪唔之得不斷有客人入嚟幫襯。
冰火菠蘿油 $28 由於行山途中都食咗啲乾糧，所以，嚟到食下午茶都喺過過口癮，嘆杯奶茶而已。菠蘿油+奶茶喺心水選擇，第一眼以為嚟錯兩個菠蘿油俾我，查實就唔喺，師傅將個包一開二而已，所以，賣相已經好破格。
一開二好似多餘咗喎？疑惑點就喺呢樣，但一拎上手謎底就解開晒，原來，切開一半，平底沾蛋漿煎香，好似整西多咁，故此，個包夠熱辣之餘，底位仲多咗層脆口加蛋香感，非常過癮。
而面頭插上兩件冰凍嘅「安佳」鮮牛油，真喺食出冰火感覺。點知喺「安佳」？無可能食得出咩品牌嘅牛油嘅，只喺店家專登貼埋出嚟啫。以前都食過好幾次冰鎮菠蘿油呀，今次又遇到新玩法，可謂菠蘿油新境界。
熱奶茶 個菠蘿油就好有驚喜喇，而呢度嘅熱奶茶亦唔失禮，茶色深褐，入口茶底醇厚芳香，茶、奶兩比例都恰到好處，口感順滑，夾菠蘿油，一流啦。
菠蘿芝士鹹牛肉炒蛋包 $36 友人就揀咗店家推介嘅呢款「菠蘿包」，喺芝士+鹹牛肉+炒蛋+菠蘿包嘅組合，聽起嚟都好勁咁啦。事實上，個包嚟到都好大堆頭，餡料堆到滿滿，友人簡單一句，個包豐富多料，味道甚具層次，夾甜包都掂喎！
炸雞脾伴沙律 $36 另一位老友對炸脾情有獨鍾，上之踩完單車晌大埔下午茶，佢又喺揀炸雞脾，但上次配薯條，今次個餐就伴「港式」雜果沙律，咩叫「港式」？咪罐頭貨囉，哈哈！不過，佢話隻炸脾真喺幾唔錯，無炸過籠，外皮香脆，入口唔油膩，大隻，啲肉又唔嚡，仲平過上次晌大埔食。
黑蒜豬骨濃湯博多拉麵 $41 個名聽落真好勁咁喇，但就最跌眼鏡嘅一款下午茶餐，其實，賣相都唔失禮，大大碗，有日式叉燒、木耳絲、筍乾、大冬菇（鎅埋花），但一向拉麵中出現嘅溏心蛋就變咗煎太陽蛋，感覺變咗車仔麵。本應黑蒜豬骨濃湯應該好穩陣，但友人就話正正喺個湯有問題，覺得個味道怪怪哋，但又唔知點形容。
照慣性，又分享少少呢次行山嘅相片，前文都講咗，呢段真喺唔易行，一味上梯級，要講韌力，但好有挑戰性。上到大帽山風景自然一片開朗，可惜喺煙霞多，啲遠景唔夠清。
整體嚟講，我覺得店家做嘅食物幾有誠意，亦花咗唔少心思，個拉麵就唔知喺唔喺意外嘅失準。招呼方面，都OK啦，雖然落單有啲亂，但都及時修正返。
個人評分
味道：9/10
環境：7/10
服務：7/10
抵食：8/10
平均每人消費：HK$28
味道：9/10
環境：7/10
服務：7/10
抵食：8/10
平均每人消費：HK$28
餐廳資料：
美景茶餐廳 Mei King Restaurant
荃灣祈德尊新村平台1樓
2499 8408
美景茶餐廳 Mei King Restaurant
荃灣祈德尊新村平台1樓
2499 8408
沒有留言:
發佈留言