2021年1月16日星期六

珺 Emerald:渾身解「素」

睇見相熟食友嘅食評,大讚呢一家中西合璧嘅新派素食餐廳,故趁周六方便,同老婆過嚟試試,因為佢喺偏素愛好者,而是日天氣又好,暖暖哋加上陽光普照,更可以順道行一行港島區嘅行山徑。「珺」字,究竟讀「君」定「郡」?原來正音喺讀「菌」,查查字典解美玉,而店名英文用了「Emerald」,即綠寶石,未知喺咪配合店名,一排梳化椅都用上綠色;然而,從店名,約略感到其所想帶出的君子雅氣。
大部份座位都設晌靠玻璃窗一邊,所以,當日陽光充沛,拉下半簾,既有天然光照入嚟,但又唔會太曬,予人感覺寧舍舒服。 
而餐廳裝修簡約得嚟又幾雅緻,除了一些「草牆」,增加綠油油嘅感覺,每枱更放有鮮花作點綴,多添幾分自然氣息。 
此外,枱上嘅擺設都頗有心思,中西合璧嘅裝飾碟,喺打卡焦點;而餐具方面,既有刀叉,亦有筷子,更特別把餐紙巾摺成一層層,套上所有餐具,單喺呢樣都睇到店家嘅誠意。 
bowl反沙腰果(免費)
坐落無耐,仲未點菜,侍應先送上小食「反沙腰果」,喺以潮州菜反沙芋嚟處理啲腰果,除好脆口之外,有種粉粉甜甜嘅感覺,而且,個小盛器都份外別緻。
再介紹吓餐牌,我估可能仍處開業初期,所以,散點餐牌都只喺以一大版A3紙印出嚟,雖然簡單,但都清晰易睇。大致上,分咗前菜、湯品、主菜、飯麵,除咗走蛋奶五辛之外,用料配搭都頗顯心思。
散點外,當然有啲套餐供選擇,分一人餐及二人餐,當然,套餐點都比散點划算。前者定價$188,包前菜、湯品及主菜(4揀1),後者定價$428,都喺包前菜、湯品及主菜(8揀3),分別在於多一份主菜,以及選擇範圍亦多啲。而兩者都可以額外加配甜品、咖啡,據店員講,每星期會轉一次餐牌,可留意番官方臉書。特別一提,餐廳會將西式嘅用餐體驗帶入服務中,即喺注重擺盤、留意客人用餐進度、同步上菜……等等。 
bowl昆布天使麵配欖油爆珠
不甘於傳統,所以,簡單嘅冷盤亦可以好有創造性,更加點食用花增加美感。天使麵做到好爽口,帶點涼意,細味到點點昆布嘅鹹鮮味,而橄欖油以分子料理方式做成「魚籽」嘅效果,一咬即爆,令麵條添了幾分油潤感。
bowl水晶粉撈素翅配芝麻柚子醬
同樣喺賣相清秀,透明嘅水晶粉入口好滑溜,加入素翅,令口感多添爽口嘅感覺,再拌以芝麻柚子醬,柚子嘅香味非常突出。如果食得辣嘅,可以試試麻辣醬,相信清爽中帶來點點刺激。
bowl西班牙蕃茄波椒湯
點解特別加上西班牙之名,店員話師傅好有要求,蕃茄及紅椒都用上西班牙貨色,之前食西班牙菜時,都知道西班牙紅椒喺特別甜。這一道湯色澤橙紅,呷一口,蕃茄味好濃郁鮮活,又帶點甜香。此外,較西式咁配上一片西班牙水晶包(Crystal lot,店員介紹時我先識),香脆到不得了,但感覺幾似我哋廣東嘅油炸鬼。
bowl秘製牛肝菌酸辣湯
簡單嚟講,就喺一道滬菜嘅酸辣湯,亮點就喺加入牛肝菌,不過,飲落就唔喺太覺有菌香,因為胡椒下得重手咗,辣味比較搶;不過,配料仲有木耳、竹笙、豆腐、素翅,而豆腐切到如文思豆腐般幼細,故每一口湯都充滿唔同口感。
bowl玫瑰叉燒
主菜之一選了玫瑰叉燒,喺店家嘅推介菜式,初以為個叉燒喺一碟過,但原來細分為兩碟,方便我哋各自食(我方便我慢慢影相)。啲叉燒唔會紅到好似平常齋鋪好色素染到咁紅,細問之下,喺用咗自家浸泡嘅玫瑰花茶、自家製嘅玫瑰醬去做,故食落有微微一陣陣玫瑰花香。口感方面,又幾像真喎,咬落外層脆脆哋口,裡面就軟軟腍腍,面頭灑了少少開心果仁碎,純粹令賣相好睇啲。
bowl菠菜瑞可塔芝士雲吞
食完道叉燒後,意式雲吞及炒雙色飯就同步登場。先分享道雲吞先,一客裡面有3大隻意式雲吞,選用嘅器皿,菜式嘅顏色配搭,都展現出繽紛嘅一面。手製嘅雲吞皮煙韌有咬口,裡面填滿菠菜及芝士,食味很搭配,而碟中嘅喺上述嘅波椒湯,又可以美味重溫。
bowl特色紅菜頭炒新豬肉炒雙色飯
西式代表嘅意大利雲吞做得出色,中式嘅炒雙色飯又會點呢?賣相同樣好靚仔,因為飯粒加入紅菜頭汁去煲,又伴以紫椰菜,仲加咗幾片牛肝菌作點綴,色彩亮麗。一入口,就食到除白米外,就喺加入咗小米,所以叫雙色飯,飯粒炒得爽身,絕對食得出喺少油,飯內混有栗米粒、青豆、新豬肉,既口感豐富,亦非常健康。
店員知我哋啲甜品喺共享,所以,好醒目自動送上一套新嘅碗碟。
bowl脆皮燕麥奶 +$30
有啲人對乳製品會有敏感,所以,由植物所做嘅燕麥奶就為呢一類人提供多一個選擇。而呢一款賣相西化嘅甜點,炸到金黃,伴以雜莓及芒果汁,睇樣已經好吸引吓。外層沾上麵包糠,炸過後入口自不然非常之香脆,重點喺一啲都唔油,而裡面嘅燕麥奶咬落軟滑,感覺有啲似食順德名菜大良炸鮮奶,總之就好睇又好食。
bowl生磨蓮子露 +$30
另一款純素甜點揀咗生磨蓮子露,皆因芝麻糊、花生糊、合桃露……等等乜糊物露都食得多,蓮子露就印象中喺第一次喇。夠膽稱為生磨,就唔喺現成貨,稀杰度啱啱好,口感十分綿密,而且,蓮子味濃郁而清甜,此外,裡面仲有加有原粒蓮子,非常好食嘅中式甜點,果然真材實料。
晌每一個環節,無論前菜、湯品、主菜,抑或甜品,都有西式、中式可揀,既可遷就到唔同口味嘅人,又可以有機會試到中西素食嘅唔同處理手法,最難得喺,無論中式,還是西式,菜式都做得色香味全,師傅可謂使出渾身解數。再者,用餐環境,以及服務,都予人稱心滿意,老婆亦少有哋大讚今餐好好。

個人評分
味道:9/10
環境:8/10
服務:8/10
抵食:8/10
平均每人消費:HK$270

餐廳資料:
珺 Emerald
中環威靈頓街2-8號威靈頓廣場M88 6樓
2855 9555

沒有留言:

發佈留言