2021年1月23日星期六

聆渢咖啡廳 Cafe Lagoon:Staycation之「早安大滿足」

前文就提及到為慶祝結婚周年,又因疫情無得去旅行,就專登揀咗遠離市區又有渡假環境嘅「黃金海岸酒店」住番晚加飲飲食食,買咗個「悠然下午茶住宿計劃」,包雙人豪華海景房、入住當日嘅主題下午茶、翌日嘅雙人自助早餐,全費$980,食完個主題下午茶,住咗一晚豪華海景房,個價真喺抵番晒,仲包埋早餐添。由於喺自助早餐,又唔知多唔多客,加上今早嘅安排喺食完早餐會輕裝行千島湖,所以,策略喺一早落嚟食早餐,避一避人流。
雖然,噚日嘅下午茶,以及今早嘅自助早餐,都喺晌「聆渢咖啡廳」,但明顯枱櫈喺排過晒,今早全場都喺排成二人枱,仲每枱都隔得好開。因為噚日啲人多數都喺食下午茶,唔安排四人枱真喺唔夠擺,但今早全部喺食自助早餐,安排成二人枱已綽綽有餘。 
而外面花園,太陽啱啱出嚟無耐,有少少旭日初照打落啲椰樹度,景觀好靚,予人感覺好舒服。 
原來,酒店嘅自助早餐定價都唔平,$258 / 成人,$188 / 小童,而如果買咗套票,額外加享用早餐人數,例如一啲親子客、三人朋友客,收費就平啲,$138 / 成人,$88 / 小童。自疫情至今,真喺未食過自助餐,因為擔心衛生、感染問題,不過,今早晌度食完自助早餐,又有唔同嘅體會。首先,座位數量目測比正常少咗一半有多,一坐低,侍應已提醒出去攞食物時要戴上口罩,而整個「攞」食物嘅過程,完全喺由廚師幫忙,客人喺唔會接觸到啲食物,所以,令我倆都安心咗好多。 
以下,就再介紹吓有啲咩食,大致上有沙律、凍切肉、栗米片、乳酪、芝士盤、熱盤、點心、粉麵、粥品、即製奄列、烘焙酥餅、麵包、窩夫、班戟、生果杯、飲品吧,以早餐而言,選擇非常之多。 
bowl第一輪:沙律、凍切肉、芝士、橙汁 
小弟頗喜歡食沙律,尤其食自助餐,第一碟點都要啲沙律開開胃先。費事太麻煩師傅,索性同佢講沙律、凍切肉、芝士三類嘢樣樣都要啲,再淋啲油醋汁,砌成一大份。雖然,嚟酒店嘅人流少咗好多,但啲食材都食得出好新鮮,完全無「求求其其」嘅感覺,不過,食自助餐喺有時要自已夾吓夾吓先好玩。
bowl第二輪:即製奄列、熱盤
食完凍嘢,通常小弟都喺食番啲熱嘢暖暖個胃,避免一次過太多生冷嘢落肚。見有即製奄列,當然要試,又喺費事煩,叫師傅樣樣都加啲,然後過隔離檔拼啲煙肉、薯餅及烤蕃茄。件奄列好好食,裡面仲做到有少少蛋漿流心嘅效果,煙肉脆口卻唔太肥,烤蕃茄亦都好甜。
bowl第三輪:烘焙酥餅、生果杯、即磨咖啡 
烘焙食物一向都喺我嘅心水,故此,見佢哋有咁多烘焙酥餅,就更加要杯即磨咖啡嚟襯啲牛角酥、朱古力酥、蘋果酥及果子麵包,幾款酥皮麵包都好有牛油香,亦鬆脆,但最有驚喜喺件果子麵包,咬落好有橙香,淨食都好好食,否則拎啲鮮果醬搽嚟食都正。順手追加份生果杯,有多種生果,唔使切就有得食,並幫肋吓消化。
bowl第四輪:迷你窩夫、班戟 
其實,食埋啲烘焙麵包都有啲飽吓,但又想過吓窩夫癮,況且喺迷你版,少少哋各要一件。最有亮點唔喺件窩夫或班戟,而喺啲蜜糖,因為,原以為喺啲普普通通嘅糖膠,但入口極之清潤,嗒得出喺百花蜜之類,唔好嘥,臨尾仲用嚟沖杯蜜糖水嚟滋潤吓添。
以小弟往績,食力可以去多兩輪,但因為唔敢食得太飽去行山,話晒上千島湖有段大斜路,所以,如乳酪、多款熱盤、點心、粉麵……等等都無食到。不過,再次住吓酒店,再次食吓自助早餐,又確喺真有種渡假嘅感覺。

個人評分
味道:8/10
環境:8/10
服務:9/10
抵食:8/10
平均每人消費:HK$284(個價錢喺官方正價,實際我買嘅住宿計劃已包。)

餐廳資料:
聆渢咖啡廳 Cafe Lagoon
屯門香港青山公路1號香港黃金海岸酒店低層地下
2452 8448

沒有留言:

發佈留言