Paul Lafayet：好友狂嚐曲（87）

好老實，供咗MPF廿年，啲基金表現真喺麻麻哋，不過，帳面都仲叫做賺緊，但只喺微利，希望退休之日能有理想嘅回報啦。而呢一日就唔知要等到幾時，之但喺小弟嘅MPF供應商「銀聯」就晌早前嘅節慶日子，送咗張「Paul Lafayet」嘅禮券嚟，我就當喺供咗咁多年嘅小甜頭，收工順路去到海港城City Super內嘅分店換埋去。

晌等候期間，就晌鋪前嘅凍櫃望望，其實，「Paul Lafayet」已在香港紮根好多年，佢嘅出品，尤其馬卡龍同法式燉蛋，大家都好耳熟能詳。不過，無打算再買其他產品，就沒再細究有無咩新出品。 

而今次「銀聯」所送嘅聖誕禮盒，原來喺曲奇嚟，火紅色嘅包裝盒，聖誕樹、聖誕雪花以簡單嘅線條勾晝出嚟，絕對喺趁番聖誕節嘅色彩。 

再打開外盒，先露出「Paul Lafayet」曲奇禮盒嘅真身！ 

而揭開盒蓋，就印有4款曲奇嘅口味，包括：Cookies with Cranberry、Cookies with Cashew、Coffees Cookies with Cashew、Chocolate Cookies with Almond，每款共有3塊，即全盒共有12塊，每一塊均獨立包裝。

Cookies with Cranberry 

先試小紅莓曲奇，由淡至濃嘛！以簡單嘅牛油曲奇做底，加入勁多小紅莓乾，睇樣都睇得出，曲奇本身好鬆脆，有牛油香，而小紅莓乾就令到曲奇帶點煙煙韌韌，又有微微嘅甜甜酸酸香味，予人感覺清新。

Cookies with Cashew 

再試就喺腰果曲奇，相對小紅莓曲奇，啲腰果粒粒就唔喺話好多，不過，啲腰果好脆口，食味亦唔錯，當然，再加多啲腰果粒就更好啦。

Coffees Cookies with Cashew 

同樣喺腰果曲奇，不過，就改用咖啡曲奇做餅底，自不然，曲奇多咗陣陣咖啡香，感覺就更好味啦，此外，啲腰果粒晌呢件曲奇顯出嚟更明顯，多而大粒，故以，一塊曲奇究竟多定少腰果粒都喺撞手神。

Chocolate Cookies with Almond 

最後試呢一塊較深色嘅喺朱古力杏仁曲奇，杏仁做成薄片，藏滿晌朱古力曲奇之內，曲奇嘅朱古力香味夠濃，加上杏仁片好脆口，基本上，都無得輸。

以往寫呢個「好友狂嚐曲」系列都喺以朋友送贈嘅曲奇為主，今次，就少少借題發揮一下，因為自疫情開始到依家，都真喺無乜同啲朋友、食友相約飯聚，所以，都差唔多近一年無寫過。另外，講啲「Paul Lafayet」嘅曲奇，佢哋始終喺整糕餅專家，自然有一定嘅質素，不過，略嫌款式好「大路」！ 

個人評分
味道：9 /10
環境：- /10
服務：- /10
抵食：- /10
平均每人消費：HK$0（朋友送贈）

餐廳資料：
Paul Lafayet
尖沙咀廣東道3-27號海港城港威商場3樓cooked Deli by city'super 3001號舖
9148 2624