寶福餐廳：寮屋區淘「寶」

今日早餐真喺要食飽啲，因為，與友人挑戰一下西貢嘅「蚺蛇尖」，講到明喺7、8級難度（10級為最難），而且，一行就要行足6、7個鐘。由於一早晌西貢碼頭巴士站等，所以，就無晌屋企食，去咗牛池灣食，正正出面就有小巴入西貢，時間好預啲。咁點解唔入到西貢先食？覺得一大朝早，裡面選擇少囉。事前晌網上搵搵，就搵到「寶福」，牛池灣龍池徑寮屋區之內，老茶記，好有「私竇」之感。

餐廳其實離港鐵出口好近，不過，唔識就唔識，幸好之前都有睇過人家嘅食評，知道大概點走，加上「村口」有大大個招牌「引路」，一見到佢落樓梯就喺，唔使周圍搵。

入到餐廳內，果然好有70年代嘅感覺，話晒佢始於1964（村口招牌寫住）。舊式時鐘、生意興隆大日曆、格仔地磚、牆上嘅手寫餐牌，都喺貨真價實嘅懷舊嘢。

無詳細睇所有「餐牌」，主都喺睇睇早餐時段有咩揀，當中包括早餐ABC，以及特餐，定價非常相宜，都喺賣$28啫。

C餐 $28

諗住食飽啲，就揀C餐，其實，ABC三個餐都差唔多，揀咗之後，後而覺得特餐仲抵，有多士，有奄列，仲有個沙嗲牛肉麵。而C餐有份蛋治、沙嗲叉燒通及餐飲。

沙嗲叉燒通

茶記嘅沙嗲牛食得多，今次就喺沙嗲叉，個湯都OK，陣沙嗲味都幾香，幾片叉燒就不過不失咁啦，唔太肥就啱我喇，而通粉無煮過腍，份量又十足，所以，絕對收貨。

蛋治

喺好家常嘅做法，無咩花巧嘢，不過，片煎蛋就真喺薄咗啲，好似煎咗片蛋皮咗，入口都唔喺好覺佢喺蛋治，哈哈！

熱奶茶

奶茶就真喺沖得唔錯，老師傅即喺老師傅，茶底香濃，芳香馥郁，口感都算細滑。老派嘅厚身瓦杯，煲溫力強，又夠大杯喎。

嚟得呢類主要做街坊客嘅小店，對於環境、服務真喺無咩要求，你見店中防疫hea hea哋就知啦。食物方面，賣到咁平，亦唔好抱太大期望，但又唔差得去邊，勝在抵食夾大件，其實，幫襯佢哋都喺想感受吓嗰份茶記老味道而已，故此，俾個笑喺有加埋啲感情分落去。

個人評分
味道：7/10
環境：6/10
服務：6/10
抵食：10/10
平均每人消費：HK$28

餐廳資料：
寶福餐廳
彩虹牛池灣龍池徑牛池灣西村115A地下
2320 4636