枱與枱嘅距離都好少，隔板都喺「緊緊好」而已，若非疫情，其實都無所謂，但就未必個個感安心。我哋被安排坐晌窗邊位，較自成一角，相隔其他枱亦多少少距離。而每張枱都備有消毒搓手液，睇得出餐廳都算盡量做。
餐牌上嘅菜式名稱都玩味十足，唔明睇睇英文翻譯，都唔明就真喺要請教吓店員。簡單嚟講，菜式類別分為小食、主菜、飲品、雞尾酒共4頁紙而已，走貴精不貴多嘅路線。
星爆氣流斬改EX $45 死佬揀咗呢一款特飲，夠霸氣喎，其實，睇中文名，抑或英文名，都估佢唔到，問問店員，喺類似雜果濱治，所以，佢先大膽一試。賣相都幾爆，飲落又真喺OK喎，就算溝勻埋啲忌廉，亦唔會覺得怪怪。
菠蘿熱情果沙冰 $45 小弟就正路少少，唔會亂咁搏，呢一杯沙冰就最啱我，因為菠蘿同熱情果都喺小弟喜愛嘅食材。沙冰入口涼透心就唔使多講，菠蘿及熱情果味都好平衡，酸酸甜甜，好配合一陣所食嘅小食。
垃圾八爪魚 $48 個名擺明有反諷意味，而點之前都知喺類似酥炸嘅菜式，估唔到比預期份量多，入口唔油，外層嘅脆漿都薄，八爪魚好有咬口，喺配普通沙律醬呢部份少咗特色而已。食落，其實感覺幾似平時晌茶樓食點心時嘅酥炸魷魚鬚。
水牛城雞翼 $50 另一款小食都喺炸嘢，其實，有別以往食過嘅水牛城雞翼，因為大多數都喺醃到入味拎去焗，但呢度嘅就沾粉漿炸好再淋上醬汁，有點點辣勁嘅醬汁喺靈魂，辣得嚟唔嗆喉，又唔會辣到死，點到即止，好惹味，算唔錯。
英國國菜1997 $107 其實即喺炸魚薯條，今晚真喺炸嘢狂熱，表面睇到嘅炸魚好大條，查實底下仲有一小嚿，加埋啲薯條，真喺好足秤。啲魚柳唔止炸得又脆又香口，肉質好嫩滑，亦唔油膩，試咗幾味炸嘢，都睇到師傅炸功真喺有一手。
焗多汁豬仔骨配薯條 $128 大家都喺麻甩佬，都喺鍾意食肉，所以，點一客豬仔骨喺走唔甩。配埋薯條，同樣，份量好足。豬仔骨燒得有點碳火香嘅感覺，肉質好軟腍，個秘製BBQ醬勁惹味。順帶一提，佢哋嘅薯條都炸得好食，香脆有薯仔味。
多汁淫蝦 $135 個菜名好似有啲不雅，其實即喺波士頓龍蝦，只賣百零蚊隻，抵喎，隻龍蝦上到枱就知無將貨就價，大隻得好有睇頭。製法只以簡單嘅烤焗，所以，食出龍蝦肉本身嘅鮮甜味，肉質好爽口，大啖大啖蝦肉入口，食得夠晒爽。而且，蝦頭有唔少蝦膏，讚！
整體嚟講，餐廳嘅氣氛唔錯，做菜有水準，雖然只有一個店員，但招呼都快手快腳，亦好有禮，只喺地方所限，環境喺窄咗啲，喺晌疫情下先有啲戒心，基本上一切都好OK！
個人評分
味道：8/10
環境：7/10
服務：8/10
抵食：9/10
平均每人消費：HK$205
味道：8/10
環境：7/10
服務：8/10
抵食：9/10
平均每人消費：HK$205
餐廳資料：
JUST'er Bar & Restaurant
尖沙咀山林道13號地下A1-A2號舖
2341 5628
JUST'er Bar & Restaurant
尖沙咀山林道13號地下A1-A2號舖
2341 5628
沒有留言:
發佈留言