2020年10月1日星期四

正記茶餐廳 Ching Kee Restaurant:搵食唯一「正」路

早一個星期先行完「藍地灌溉水塘」,今日就趁天氣好,再次上一上「千島湖」。其實,8月尾都有到訪過「千島湖」,因為都真喺算易行嘅山徑,加上有個靚景。而今次,我哋早出發,計算好行完約中午1:30pm左右返到「掃管笏村」,就晌「正記」食個午餐先走。
「正記」最剎食就喺有大量露天位,我哋原本亦揀咗坐出嚟,但剛啱坐落,就發現後面枱嘅客人煲緊煙,亦唔覺佢會就快走,所以,唯有焗住坐返晌室內。因為成個「掃管笏村」得佢一間食肆,否則要出到黃金海岸商場,所以,一眼望上去,街坊客多過行山客。
餐牌一次過影出嚟俾大家參考,由早餐、常餐、午餐、下午茶餐、碟頭嘢、粉麵餐、小食……等等,都一一有供應,定價跟市區嘅差不多。
bowl炸雞翼通粉 $39
老婆就唔太餓,所以,點碗湯通粉就可以喇,個碗就大大隻,但通粉唔算多(對佢嚟講就仲好),而炸雞翼亦只有3隻,但竟然放埋落啲湯度,認真喺敗筆,點到浸腍咗少少外皮,影響其香脆度。幸好,啲通粉無話煮到腍晒,否則真喺災難,至於個湯,普普通通咁啦。
bowl菠蘿雞粒粉飯 $56
午餐相對抵啲,但幾款都覺得麻麻哋,結果就揀咗「菠蘿雞粒炒飯」,落單時阿姐好好人,溫馨提示我等唔等埋下午茶時間,因為都有呢款炒飯都揀,但就平$9,但有啲餓,唔想等,可是,2:00pm都未上到個炒飯嚟!講番個炒飯,大大碟,都好足料,有唔少雞肉粒,菠蘿就預咗喺罐頭貨,但落得少,無乜菠蘿嘅香氣,幸好啲飯炒得爽身。
bowl咖喱海鮮炒飯 $56
其中一入友人點咗午餐嘅粟米雞粒火腿飯,製作hea到爆,得好少料,亦非常快就上到菜,可惜無影到相。而另一位友人嘅咖喱海鮮炒飯就值得講講,除料多,以咖喱嚟炒飯,超惹味,飯粒微微濕潤,感覺非常好。
bowl凍奶茶+$3、熱檸水
到茶記,熱奶茶喺必然首選,行到一身汗,當然轉飲凍嘅。呢道嘅奶茶做得不俗,頗為芳香,茶底夠厚身。
8月尾上「千島湖」嗰次,就天氣好鎳好,但就好多人,今次就時陰時晴,相對卻喺人少。分享番前後兩次嘅靚景相,而呢條線確喺幾易行。
佢哋嘅炒粉飯麵都算OK,但遇正飯市就要等好耐,而午餐會好快有,但就好快餐式,質素麻麻。雖然,室外環境寫意,但無劃出部份作禁煙,所以,坐出去就要有吸二手煙嘅準備。

個人評分
味道:7/10
環境:6/10
服務:5/10
抵食:7/10
平均每人消費:HK$50

餐廳資料:
正記茶餐廳 Ching Kee Restaurant
屯門掃管笏村地下361號舖
2567 6882


沒有留言:

發佈留言