老三油渣麵 Brotherhood：膽固醇？拋「豬」腦後！

因為好多親戚都住晌深水埗、長沙灣一帶，咁小弟都住晌美孚，所以，呢一頭都會間唔時經過。呢一日就喺落長沙灣剪髮，經過呢一間「老三」，原則上賣麵都唔喺咩特別，但「油渣麵」三個字就加大咗興趣。

睇招牌下面嘅宣傳，原本總店紮根晌土瓜灣6年，依家開到嚟長沙灣。走入餐廳內，以為一字長形，原來去到尾尾，屈個彎仲有幾張枱。簡單嚟講，裝修都喺平平實實，牆上貼滿菜式相。

食物選擇就印晒晌一張A4紙之上，加入少少插圖，除咗招牌嘅油渣麵之外，仲有啲特色麵、小食及飲品，而飲品有加配優惠。

招牌油渣麵 $38 + 豬腩片 $9

入得嚟都喺想試佢哋嘅油渣麵，而油渣麵可揀唔同辣度，麵條粗幼亦有得揀，每碗都包咗自家製豬油渣、冬菇、蘿白。咁咩叫豬油渣呢？餐廳有啲單張介紹，小弟就唔好抄一次喇，自己睇睇。

今餐都真喺高舉膽固醇萬歲，睇完張單張，你都知豬油渣喺肥膏嚟，再加埋啲豬腩片，堅喺肥膏一嚿嚿，真喺要走多兩轉山先可以燒脂得晒。

但話時話，無論啲豬油渣，抑或啲豬腩片，咬落又無想像中咁肥，啲豬油渣仲卜卜脆，好甘香添，而冬菇、蘿蔔都喺有質素嘅食材，配上海粗麵，咬口有韌勁。

熱檸檬西洋菜蜜 +$9

諗住又豬油渣，又豬腩片，所以，原本諗住揀杯檸檬茶，當喺消消滯，不過，近日非常乾燥，改為檸蜜，消消膩，又可以潤吓。

出咗門口，先為意到有張螢光黃嘅「招紙」，寫住抗疫期間，5:30pm-9:30pm，外賣麵餐送嘢飲。

餐廳都喺賣平實、舊懷嘅味道，豬油渣呢家嘢，我諗後生嘅都唔太識欣賞，佢哋食和牛就識話脂香四溢，豬油渣就會話喺肥膏嚟，所以，望落幫襯嘅都喺中上年紀嘅街坊客多。尤其依家講健康嘅年代，呢類平民得嚟但唔多健康嘅美食已買少見少喇。

個人評分
味道：8/10
環境：6/10
服務：7/10
抵食：8/10
平均每人消費：HK$56

餐廳資料：
老三油渣麵 Brotherhood
長沙灣青山道338號順利商業大廈地下A號舖
6430 9992