美心西餅 Maxim's Cake：少甜之選

雖然老婆份工喺兼職形式，但佢公司算幾好，逢喺過時過節，都有啲應節嘅禮物。就好似中秋，就會一人一盒月餅，不過，好搞笑，留意咗佢3、4年，年年都喺送「美心低糖蛋黃白蓮蓉月餅」。我倆公婆對食月餅無咩要求，收到咩月餅都開心。不過，睇返之前嘅食評，呢款月餅嘅包裝盒都無變，仍然喺一身橙紅色嘅鐵罐，亭臺樓閣配荷花，鮮艷嘅色彩配搭，好有古雅之氣。

盒面右上角，仲刻意標示含糖量低於5％，小弟無查証過，因為睇完後面嘅營養資料一欄都唔喺好明點計出嚟，不過，本身一向都唔太信呢類標示，最緊要咩都唔好食過量。

打開盒罐， 一盒共有6個，均以獨立包裝處理，衞生方便。順帶一提，近呢幾年嘅月餅，已少咗奉送啲膠刀、膠叉，對環保方面算有少少進步。

包裝盒無變，而質素依樣亦無變，皮薄而平均，白蓮蓉好軟滑，亦唔甜膩，最正喺個鹹蛋黃流晒油，搭杯熱茶，喺下午茶嘅好配搭。

今年所食嘅月餅都以奶皇為主，蓮蓉或白蓮蓉都少食咗，其實小弟真喺對此無乜偏好，因為奶皇有奶皇好食嘅地方，蓮蓉亦有蓮蓉值得欣賞嘅地方。

個人評分
味道：9 /10
環境：- /10
服務：- /10
抵食：- /10
平均每人消費：HK$0

餐廳資料：
美心西餅 Maxim's Cake
葵涌新葵興商場2樓38號舖
2429 3251