2020年9月23日星期三

Fûhn:牛「More」套餐

三年多前到訪過新派越南餐廳「Fuhn」,當時嘅印象都幾唔錯,嗰陣時主要都喺賣越式湯粉,所以,餐廳名字先叫「Fuhn」。但時隔數年,今次再訪,因為知道佢哋變化咗好多,食物嘅選擇就唔再得湯粉。
先講講環境,一出電梯就喺餐廳,喺好多食廈嘅門面設定,一到步量體溫、搓手喺,喺新常態嘅指定動作。環境裝修簡潔明淨,以四人枱為主,我哋一行4人,被安排坐晌最尾一角,喺最幽靜嘅位置。
上文都講咗比前多咗食物揀,就睇睇有咩選擇,可謂種類繁多,除咗湯粉,就仲有多款特色越南小食、沙律、越式法包、熱盤、蔬菜、甜點……等等。
飲品方面,亦都喺選擇多咗,除汽水、沙冰、奶昔之外,仲有多款特飲及雞尾酒。
而我哋今次主要喺試試佢哋嘅4人套餐,分A、B、C、D款,基本會包火車牛鍋粉(XXXL特式牛湯粉,焗牛筒骨,燒牛仔骨)、越式炒通菜、4杯指定飲品,再配搭一組小食拼盤+米紙卷,每款套餐定價$888 + 10%。套餐嘅指定飲品亦可以轉餐牌嘅其他飲品,以半價計。
除咗枱旁嘅基本調味醬料之外,甫坐低就會送上配料及香草,配料喺啲銀芽、青檸、辣椒俾客人稍作調味,喺食湯粉必備。
bowl香茅檸檬茶(套餐指定)
香茅嘅味道喺點,老友都知,檸檬茶更喺飲唔少,但混入檸檬茶都喺第一次。友人話效果唔錯喎,唔會覺得怪,檸檬茶中滲出陣陣香茅嘅獨特香味,甚有一種清幽感。
bowl蝶豆花青檸梳打 +$19
兩位友人就不約而同揀呢一款,皆因貪佢靚靚哋,確實加咗蝶豆花落去,陣陣泛紫,真喺好靚,極有視覺效果,味道呢?都喺一杯青檸梳打,味道清爽。
bowl蜂蜜蝶豆花檸檬茶 +$19
小弟都喺揀碟豆花特飲,唔喺貪靚,喺貪其功效,我哋啲咁年紀,喺要提高吓免疫力,預防吓眼疾……等等。加咗蜂蜜,配檸檬茶,入口感覺有微微花香味。
bowl四人特上小食拼盤
我哋揀個D餐,先嚟個小食拼盤,餐牌上本身標示有4隻蒜蓉牛油雞翼、4件手打蝦餅及8件春卷,但店員話今日做咗少少調整,轉咗俾多款啲嘅小食,每樣兩件,等客人可以試多啲,都好喎。而調整咗之後嘅小食有蒜蓉牛油雞翼、炸扎肉、豬肉串、越式春卷、手打蝦餅、椒鹽軟殼蟹,伴以越式沙律菜及3款醬汁,平常就會逐樣評吓,今次就綜合大家意見嚟講講。基本上,各款小食都好香口,卻唔油膩,醬汁亦頗有特色,啲酸酸香香嘅沙律菜亦發揮出平衡嘅作用。
bowl扎肉米紙卷 
米紙卷喺越南嘅特色小食,套餐當然有包括在內,米紙卷十分薄透晶瑩,裡面捲住好多扎肉、米粉、生菜、甘筍絲,紥得夠實淨,入口口感煙韌而清爽,淨食嘅話,味道較清淡,但伴以獨特帶微辣嘅花生醬就好有畫龍點晴之效。
bowl香草焗牛筒骨 
跟住,喺大大條有霸氣嘅牛筒骨登場,而牛筒骨烤得焦香,甚具睇頭,伴以蒜蓉包佐食,將香草牛骨髓搽晌蒜蓉包,真喺惹味、香脆。唯一唔理解嘅喺,睇餐牌散點呢一款香草焗牛筒骨喺跟6件蒜蓉包,而套餐嘅就跟得3件蒜蓉包,但呢個喺4人套餐啊!
bowl越式香茅牛仔骨 
繼續牛牛狂熱,香茅豬扒食得多,香茅牛仔骨就第一次試,啲牛仔骨燒得甘香,上枱時已多多少少聞到陣陣香茅味。咬落啲牛仔骨肉質都算腍,而香茅味更突出到肉香,唔錯!唔錯!
bowl火車牛鍋粉 
餐廳本身有供應一款一人份嘅「火車牛魔粉」,即喺一次過包咗6款牛食材:安格斯牛、牛坑腩、手打牛丸、牛筋片,牛腩邊同牛栢葉,而眼前我哋呢個「火車牛“鍋”粉」,即喺加倍咗嘅4人份,個碗如同一個大鍋,仲即場倒入牛骨湯,份量超十足,夠晒有氣勢。
先試一口湯底,夠濃郁,但唔會好似日式豬骨湯咁漿口,可以講喺濃而不濁,而金邊粉非常滑溜,前前後後每人都可以分到成3-4碗,食到我哋捧住肚走;至於啲食材,絕無欺場,一樣交足貨,安格斯牛好嫩滑,牛坑腩軟腍,帶少少油脂有份羶香,手打牛丸入口十分彈牙,牛筋片個人就稍嫌切得太薄,無咗牛筋嗰份口感,牛腩邊夠晒肉香,牛栢葉則好爽口。 
bowl越式炒通菜 
食咁多肉,最後來一道簡簡單單而惹味越式炒通菜,雖然簡單咋,但炒得夠鑊氣,通菜爽身得嚟有清甜嘅菜味。
話就話喺4人餐,但老實講,5-6個人都夠食,而整體食物嘅質素好唔錯,份量又夠晒足,用料不賴、足秤,招呼不俗。如果,套餐有埋甜品作結,咁就完美喇!

個人評分
味道:8/10
環境:7/10
服務:7/10
抵食:8/10
平均每人消費:HK$255

餐廳資料:
Fûhn
銅鑼灣駱克道459-461號The L. Square 1樓
22198328

沒有留言:

發佈留言