彩龍船中西美食坊：人情味「龍」

「祖堯邨」對小弟嚟講，可以話既陌生，又熟悉，點解？陌生，喺因為從來無進入過呢條邨，熟悉，喺因為每每由美孚行上「華景山莊」（當行山），實經過「祖堯邨」，但只限外圍。今次，卒之入邨喇，因為送個焗爐俾朋友，兼聚一聚，就相約晌邨內嘅茶記「彩龍船」食個下午茶。

餐廳轉咗老闆，比以前喺集團「彩龍」經營時，質素提升咗，但環境依舊，兩側喺卡位，中間就一排細圓枱，裝咗啲大電視俾客人電視撈飯。「祖堯邨」都好多年歷史喇，聽友人講，都算喺條老人邨，所以，幫襯嘅都喺啲街坊客、家庭客，加上位置縮咗上去，就更無乜生客，相反，嚟嚟去去都喺嗰批食客，店員跟食客有傾有講，噓寒問暖，更顯得人情味濃。 

睇番以前啲食評，都會見到供應吓點心，大抵因為喺有酒樓集團嘅背景。但依家，賣嘅嘢就如慣常晌茶記所見嘅，早餐、午餐、茶餐、碟頭飯餐、晚市小炒……等等。 

就連放晌枱上嘅餐牌，跟外賣紙一樣，都喺平實版，只喺白紙黑紙嘅普通影印單色，無乜花巧。既然嚟下午茶，目標清晰，就向茶餐一欄睇睇。 

沙嗲牛肉包餐 $31

呢度就無賣菠蘿油，不過，沙嗲牛肉包都啱我，皆因茶記嘅沙嗲牛肉普遍都做得有一手，又喺百搭食材，早餐、午餐、常餐……等等都會有佢嘅蹤影，定價亦都合理。

麵包用上巨型嘅潛水艇包款，大大個，算好有誠意，而且，包身烘到暖暖，質感非常軟熟；包內塞滿好多沙嗲牛肉，絕無欺場，牛肉醃得入味，口感軟腍，但唔會好似搵啲鬆肉粉「乸」到散晒，個汁底又香濃惹味，份量啱啱好包住啲牛肉，唔會因為過多而瀉到一手都喺。 

熱奶茶 

喺小弟落茶記嘅心水至愛，更鍾意傳統嘅厚身茶杯，保溫力強。杯奶茶有水準喎，茶底醇厚芳香之餘，口感都算細滑。所以，經常都話，晌茶記揀奶茶，真喺衰極都有個譜。 唯一要改善嘅地方，喺杯口有啲崩，怕啲老友記鎅親口就唔好啦，換走去就大家都安心啲。

不經不覺，坐咗個幾鐘，坐到人哋茶市啲客都走晒，但突然有啲寂靜感，老邨就喺咁樣。所以，友情可貴，他朝大家都做咗老友記，都喺靠飲吓茶維繫友情，彼此問候。

個人評分

味道：8/10
環境：7/10
服務：7/10
抵食：8/10
平均每人消費：HK$31

餐廳資料：
彩龍船中西美食坊
葵涌祖堯邨祖堯商場3樓
2307 1999