君好宴會廳 Betterment Banquet Hall：我的星期六美孚早餐 ~ 祝君安好

嘆茶唔喺我倆公婆常備嘅節目，因為一大班人飲茶夠為高興，又可以試多啲點心。查實呢間新開無耐嘅「君好」都想試試，不過，疫情關係，一直延遲開檔，講開呢個位，其實好難做，由小弟十多年前初嚟美孚報到，個鋪位由「盈暉海鮮酒家」轉為「凱旋門宴會廳」，之後再轉手為「百樂門宴會廳」，跟住轉為「鳳城皇宴」，都做唔掂，年初就轉為「君好宴會廳」。

之前所見，都喺換湯唔換藥，餐廳名改咗，但環境格局同侍應無變；不過，今回嘅「君好」就似乎唔同晒，整個環境嘅佈局完全改晒，更掉走晒啲大型水晶燈，舞台改設晌中間，有晒鼓琴，擺明就唔再幻想做酒席生意，改而做吓啲茶舞或團體週年晚宴之類。

基本點心紙就喺以下呢張，有列明晒唔同日子、唔同時段嘅價錢，以及茶錢幾多，可謂童叟無欺。 

仲有另一張點心紙，喺我哋嘅目標，因為都喺啲早市嘅優惠點心，如多款特惠孖寶咁，星期六、日、公眾假都有，只喺俾多$3而已，一樣覺得划算。 

鮮蝦菜苗餃、蠔皇鮮竹卷 $29.8

特惠孖寶A老婆剔咗菜苗餃同鮮竹卷，兩款都喺佢嘅心水點心。先介紹前者，標準份量，一籠有3隻，隻隻皮薄晶瑩，咬落唔黏牙，雖然啲菜苗刴得比較粗，但都好嫩，而且，啲鮮蝦口感爽彈，又夠鮮味，最啱喺鮮蝦跟菜苗嘅比例都啱啱好。

蠔皇鮮竹卷亦喺一籠有3大件，外層嘅腐皮部份好嫩滑，裡面填滿豬肉、木耳絲、甘筍絲、紹菜……等等，幸好啲豬肉唔太肥，個蠔皇汁都OK。總之，兩客點心加埋都唔使30，份量又夠，亦無將貨就價，抵食到痹。 

香煎芋頭糕、香煎蝦米腸 $31.8

特惠孖寶B有唔少飽肚嘢，如粥飯、馬拉糕，不過，老婆就想食芋頭糕及煎睇粉。但意外地，兩款點心都超足秤，先講芋頭糕，比出面常見嘅都算喺厚切，而且，有唔少原粒芋頭，又混有好多蝦米，再者，煎得帶點焦香，入口又夠挺實唔削身，有料到。

而「香煎蝦米腸」亦喺賣大包嘅份量，堆滿一大碟，煎得OK啦，再煎得香口啲就更好，而食落都有啲米香嘅，再沾點甜醬、麻醬，自不然好食好多。 

焗叉燒餐包 $21.8

呢款點心就喺小弟想食嘅，睇落焗起嚟嘅賣相都幾正咁，攞起手熱辣辣，入口包身好鬆軟，咬落去叉燒餡唔會太過濕，啱啱好，而且，瘦叉佔多數，故此唔會太肥、太膩，啱我哋嘅口味。

對於今餐早茶，印象唔錯，總括一句可以講喺抵食夾大件，其實，今日嘅份量都夠3個人食，而且，地方新簇舒服，招呼又到位，所以，食得我倆都好稱心。

個人評分
味道：8/10
環境：8/10
服務：8/10
抵食：9/10
平均每人消費：HK$55

餐廳資料：
君好宴會廳 Betterment Banquet Hall
美孚景荔徑8號盈暉薈1樓126號舖
3188 1001