MX：鹹牛茶餐

好耐之前，晌同區嘅大快活食咗個熱狗餐（熱狗配紅豆冰），之後見美心都有，仲要平兩蚊添，所以，趁行完山過嚟幫襯吓，況且，呢間美心都好耐無幫襯過喇。

以往茶市都有幾多客人，但疫情嚴峻，真喺少咗好多客，連帶外賣亦少。今次得一支公過嚟，多位到點坐都得，就專登揀個最入嘅死角位，少啲人行嚟行去嘛！

以往啲下午茶餐都好多選擇，依家呢？就一眼睇晒得7款，賣$23-$43，咦！無咗之前嘅熱狗配紅豆冰餐，幸而有款「扒芝士鹹牛肉三文治配紅豆冰餐」，同樣啱晒我，相信呢款都喺熱狗餐嘅替代。

扒芝士鹹牛肉三文治

因為喺即點即做，相對等嘅時間都長，不過，出嚟嘅成品好滿意。一來三文治烘得底面都脆口，二來鹹牛肉嘅份量無欺場，而且，唔喺就咁加入罐頭鹹牛肉，仲搵啲洋粒炒過，搭埋半溶嘅芝士晌裡面，鹹香好食，喺好有誠意嘅出品。唔知喺咪依家客少，師傅都有多啲時間慢慢製作。

紅豆冰

雖然，對比起上次晌「大快活」嘅出品，今次晌「美心」嘅就無咁多紅豆，但啲紅豆都好清甜，夠晒腍，要求少冰，卻仍保持清涼感。

其實，有時快餐店嘅出品都可以好唔錯，不過，就喺客人多，乜都想快，就影響質素，而今次就難得食到個滿意嘅下午茶。

個人評分
味道：8/10
環境：7/10
服務：7/10
抵食：8/10
平均每人消費：HK$25

餐廳資料：
MX
美孚美孚新邨第七期萬事達廣場地下N50A號舖
2371 2701