滿滿食堂 Man Man Canteen：日式食堂 • 港式早餐

因為晏咗起身，趕唔切整早餐，故此兩公婆各有各食，所以，先返到中環睇睇時間，有時間就堂食，無時間就買返公司食。最後，時間都OK，就食埋先返公司，而今次所試嘅餐廳喺位處地庫嘅「滿滿食堂」，主線喺日式平民食堂，但早餐就絕對喺港式，經過見啲早餐幾好，又唔貴，故今次就幫襯吓。

走進餐廳，都見到防疫措施都做唔少，收起咗部分枱櫈，卡位戈之間拉起啲膠膜，而枱上面大部分嘅位都棟起咗紙板，雖然唔靚仔，但有用就得啦。其實餐廳本身喺賣和食，所以，裝修都算骨子企理，地方比想像中闊落，夠光猛令人感覺醒神啲。

餐具、餐紙放晒晌枱上，其實，佢喺有個膠蓋冚住啲刀叉，不過，拎開後再冚番有啲麻煩，因為啲刀散開晒，要將啲刀叉揸番埋一齊先可以吸番個蓋，我估啲人就喺費事掂到啲刀叉而無冚返個睇蓋。店主真喺要考慮換過個裝刀叉器皿，尤其當下隻病毒傳播力強。

早餐嘅選擇，門口已經有個放大版餐牌樹晌度，就喺路經見到先吸引到我。基本上分3大類：招牌炒滑蛋之料理、早晨扒之選及湯麵之選，最平$32，最貴嘅都只喺$39。順帶一提，無加一，只收現金。

招牌炒滑蛋之料理 $32

炒滑蛋都有3款選擇，招牌炒滑蛋、黑松露鮮菌炒滑蛋、芝士炒滑蛋，本來喺想試黑松露口味，但店員話今朝無供應，退二求其次，就要咗芝士炒滑蛋配煙肉，再跟奶醬脆豬，飲即磨咖啡。

芝士炒滑蛋配煙肉

炒蛋嘅大份量確喺唔少，感覺都有2-3隻蛋，睇樣你都覺得佢炒得滑，確實，入口啲蛋好嫩滑，帶點蛋漿感，而芝士隱若藏晌炒蛋之中；煙肉亦唔喺得啲肥膏嘅平價貨，煎得香脆，夾埋啲蛋一齊食，別有一番風味。

奶醬脆豬

豬仔包烘得脆口，而包心則保持煙韌嘅口感，面頭塗滿奶醬，師傅一啲都唔手緊，仲喺用上粗粒花生醬，啱晒我。

即磨咖啡

有個醒神嘅早上，梗喺嘆杯即磨咖啡啦，入口感到嗰份醇香，飲得出喺即磨嘅出品，牛奶嘅比例啱啱好，所以，好啱飲。

雖然因工作關係，都唔能夠太過慢慢嘆，不過，食到一份滿意嘅早餐，心裡面唔多唔少都有多份動力。

個人評分
味道：8/10
環境：7/10
服務：8/10
抵食：8/10
平均每人消費：HK$32

餐廳資料：
滿滿食堂 Man Man Canteen
中環皇后大道中58-60號振邦大廈地庫
2653 6678