2020年8月11日星期二

Kebabchi:卡巴轉轉肉

抗疫疲勞?自問應該唔算,因為公有包伙食關係,所以,日日都喺住家式嘅兩餸飯,不過,偶爾午飯都想食得特別少少。最近,就有食友介紹我呢一家主打土耳其卡巴嘅小店「Kebabchi」。雖然,晌中環食餐晏平唔得去邊,快餐店普普通通嘅飯盒一般都四十零蚊起跳,但「Kebabchi」嘅午餐就要近六十蚊起跳,老實講,感覺確喺唔平。
講得小店,又確喺好細,上咗幾級樓梯,就喺製作食物嘅地方,後面就有張4人枱,基本上都唔會坐晌度食,因為都幾焗、幾熱吓,都喺貪得意走上嚟睇睇,而餐廳明顯主要都喺做外賣客。
鋪面就張貼咗兩大張餐牌,簡單而言,一張喺套餐,一張喺散點菜式,前者有雞肉、牛肉、羊肉、蔬菜供選擇,可以配卡巴卷、沙律、沙律及白飯、沙律及薯條,定價為$58-$88,而午市奉送一客餐湯或一罐汽水,晚市就無嘢奉送,但可以以combo形式加配。
散點菜式方面,就有啲開胃小食、土耳其卷、沙律、甜點、各式飲品供選擇,頗有土耳其風味。
bowl薯蓉湯(餐湯)
比起汽水,揀餐湯好似特別啲,咁今次又確喺揀啱,薯蓉湯真喺好少飲到。個湯質感好挺身卻做到滑溜感,薯仔嘅味道好濃厚,又似有陣陣香料香,喺帶有土耳其風味嘅湯品耶,實屬不俗。
bowl轉轉燒羊肉配飯及沙律 $82
有睇過小弟嘅食評都好,遇上有羊肉菜式,我不時都會揀羊肉,唔想太熱氣,就配飯及沙律,拎上手時已感覺到好墜手,返到公司打開睇睇,堅大份,飯呀、沙律呀、卡巴羊呀,塞滿晒成盒。另外,如果稍有留意嘅話,就知道佢哋用嘅食物盒喺可自然分解嘅環保紙盒,值得一讚。
隨餐仲附上特別醬汁,溫馨一提,咪以為淡橙色嘅喺千島醬,查實食唔出喺乜醬,但入口喺勁辣,完全呃晒,小弟唔嗜辣,仲落咗鬼咁多,只好搵啲乳酪醬中和一下。
先講講啲沙律,以生菜、甘筍絲、紫洋蔥及蕃茄做底,再淋上橄欖油,灑點黑胡椒,簡單清新,為滿滿嘅羊肉作平衡點。
啲羊肉你都見,真喺堆到滿滿,夠晒羊味,但唔太羶,不過,個人就覺得有少少乾,但還OK嘅;下面嘅飯底超多,以女生計,可以話喺兩個人嘅份量,小弟平時食晏都喺大半碗飯而已,又唔想嘥咗啲飯唔食晒佢,所以,今次嘅飯量算喺超標。
受堂食嘅限制,依家飲食真喺好難做,相反,主打外賣,尤其小店,因為基本成本(如鋪租、人工)相對低啲,加上依家多咗好多人喺買外賣,故此,呢類小店可能仲易咗「疫」境求存到!當然,希望痠情盡早過去,社會秩序回復正常!

個人評分
味道:7/10
環境:-/10
服務:7/10
抵食:7/10
平均每人消費:HK$82

餐廳資料:
Kebabchi
上環永樂街87號泰達大廈地下2號舖
9831 2176

沒有留言:

發佈留言