紅城粉麵 Red City Restaurant：麵檔茶餐

平常去食下午茶都喺星期六、日行完山之後，喺呢啲時間先叫有啲閒情逸致，今次都差唔多，不過，就唔喺晌九龍區或新界區，而喺落番嚟中環轉港鐵返九龍，順道晌中環嘆個下午茶而已。路經「紅城粉麵」，真喺好隨意就入咗去。

店內環境唔大，實屬小店一家，地方算四正整潔。用餐期間見到有啲人走到廚房旁條樓梯，原來，仲有二樓雅座，不過，就無上到睇睇。

餐廳都主力做外賣，所以，有啲外賣單張攞，掃描貼出嚟，有啲咩揀，就一目了然。而嚟得食下午茶，目標就自然好清晰。

冰鎮菠蘿油餐 $27

其實下午茶嘅菠蘿包餐賣$22，加牛油就額外多加$5，加片牛油俾多$5查實感覺喺有點貴，但整份賣$27，對比起之前晌唔同區食過嘅菠蘿油餐（$24-$32），呢度嘅價位算喺屬中間啦。

菠蘿油

啲菠蘿包見店員由前枱拎番入廚房烘番熱，所以，面皮食起嚟好脆，散到一枱都喺面皮碎，包身一貫港式包嘅軟熟。最搞嘢喺件牛油另上，仲真喺冰鎮住，感覺都喺花巧大於實際。

熱奶茶

奶茶就比預期稍遜，主要喺茶底唔夠香，入口少咗份醇厚感，但又唔可以話佢差，只喺中規中矩咁啦。

雖然食物方面就一般般，不過，啲阿姐就好有禮貌，而且，幾好招呼。家吓疫情之下飲食業都幾難做，所以，啲阿姐都話，有份工撈，點都要做好啲嘅。

個人評分
味道：7/10
環境：7/10
服務：8/10
抵食：8/10
平均每人消費：HK$27

餐廳資料：
紅城粉麵 Red City Restaurant
中環機利文新街10號地舖
2726 5080