2020年6月24日星期三

十和田 Towada Sushi:「鮮」入為主

以前嚟Mikki主要都喺落「一田」,但就真喺好專登先會過嚟,依家有咗啟德站,過嚟Mikki就直接同近咗好多,唔使再由黃大仙站或鑽石山站駁小巴過嚟。趁過開嚟新蒲崗啲廠廈攞嘢,順便到「一田」買少少醬料,又順便食埋個飯先走,點指兵兵,隨意入咗「十和田」。
貪佢由門面望入去地方大,環境濶落,樓底高,空間感強。一室和風淺木色系,配以明亮黃光,柔和舒服。鋪尾一邊喺對住街景嘅落地大玻璃窗,不過,入咗夜外面有啲黑,就無乜景。
如有留意,每張櫈下都設有一個小籃,讓客人放吓雜物、背包或小袋,非常貼心。不過,大個啲嘅背囊就塞唔落喇!
日式芥末、醬油、筷子早已放晌枱上,而餐碟拎上手喺啲好有質感嘅陶瓷,仲印有「十和田」鋪號,娩白色嘅碟面,半點污漬都無。
呢度無實體餐牌,店員提供二維碼,搵手機掃一掃就進入餐牌介面。否則,亦可利用餐廳提供嘅平板進行點餐,夠晒環保。食物分類、價錢、參考圖片都一目了然,而且,落咗咩單,亦可隨意覆核,非常易操控。
由於好難逐個分類打開個介面嚟影相,故只有將所有分類做個截圖,等大家大概知道有啲分類而已。
bowl信州白葡萄梳打 $38
原枝嘅白葡萄梳打連雪凍咗嘅Suntory啤酒杯送嚟,倒入梳打後,幾有飲啤酒嘅感覺,哈哈!入口先喺冰涼嘅感覺,非常清爽,而葡萄味頗突出,帶點甜味,加上梳打散發嘅氣泡,真喺幾有種飲緊葡萄汽酒嘅感覺,只喺差在有無酒精而已。
bowl北海道凡立貝松葉蟹丼 $148
見餐廳供應唔少丼飯,而小弟一見有蟹肉元素嘅丼就甚感興趣,因為鍾意食蟹,但就唔多鍾意拆蟹,嫌麻煩囉,又唔熟手,所以,專登點咗呢客「北海道凡立貝松葉蟹丼」。唔喺講笑,直情喺蟹肉大放送,啲蟹肉鋪滿飯面,撩起嚟睇目測有半吋厚,加埋大大粒雪白嘅凡立貝、晶瑩剔透嘅三文魚籽,非常有睇頭,未食都吸引死,實在無揀錯。
先試試啲北海道凡立貝,果然喺靚嘢,大大粒,又夠厚身,口感卻柔嫩非常,味道清甜,極之鮮味。間場又可以配以一片醃蘿蔔或酸薑片,均可大大提升下一啖所食嘅凡立貝或松葉蟹肉嘅鮮味。
再試吓啲松葉蟹肉,有唔少大大嚿嘅蟹肉,淨食帶有海水嘅鹹鮮味,肉質挺實,唔會霉霉爛爛,甚具質素。最正喺唔使拆,啖啖蟹肉入口,爽到爆。
而門面掛住個「日本產米」使用,質素有保証。確實,啲赤醋飯咬落更有飯香,質素黏糯,而且,份量十足,單喺食完晒成碗飯,非常飽肚。飯內更放有一片紫菜,再加啲蟹肉、三文魚籽、日本芥末,一口過放入口,食味一流。
做咩事都好,多多少少總會先入為主,第一印象頗重要,一定店嘅門面、環境予人感覺好多少都有着數,再配合埋企晌門口負責招呼嘅店員,有好嘅態度,會幫到餐廳給人有個良好印象。食海鮮丼,如果啲食材睇落夠新鮮已大大提升食客嘅信心。個松葉蟹丼比預期好食,尤其滿滿嘅蟹肉,食得好滿足;加上舒適嘅環境,人唔太多,唔會嘈嘈吵吵,招呼殷勤,可以輕鬆用餐,悠閒舒服!

個人評分
味道:9/10
環境:7/10
服務:8/10
抵食:8/10
平均每人消費:HK$205

餐廳資料:
十和田 Towada Sushi
新蒲崗太子道東638號Mikiki地下G27號舖
2808 0468

沒有留言:

發佈留言