2020年6月17日星期三

Oasis Bar & Grill:美食綠洲

由於疫情開係,無同啲親友聚舊好耐喇,雖然,依家限聚方面放寬咗好多,但小心起見,仲未有啲家族大聚會。不過,較為老死嘅表哥,就約咗佢聚一聚,對上一次相聚已喺舊年11月嘅事,仲記得嗰次約佢喺晌尖沙咀嘅一家酒吧餐廳,今回再約,都喺揀咗一家酒吧餐廳「Oasis Bar & Grill」,喺友人試過嘅極力推介,原來,更喺一家新開無耐嘅餐廳。
晌鋪面,已覺得好型格,入去前量體溫喺新常態嘅基本動作,但竟然仲提供埋擺口罩用嘅白信封俾客人,真細心。走到入內,一室以黑色為主調,配以聚焦燈,極度時尚感。室內嘅環境都頗大,地方感覺闊落,鎅開幾個用餐區之外,還有少少高腳枱櫈,適合純粹嚟歡樂時光。
值得留意嘅喺,室內嘅裝修加咗唔少綠化,而天花燈更喺花咗心思,喺啲樹枝嘅造型,以及雀鳥狀燈飾,貫徹咗餐廳嘅名字「Oasis」!
再走入餐廳另一邊,化身成休閒區,架設咗唔少吊椅,喺好多客人搶住嘅打卡位,從而令整個區域添咗幾分清新、閒逸嘅情調。
點解影套餐具?無錯,喺別有用心,喺想講講佢哋嘅服務。餐枱墊摸上手,喺特製矽膠做,易於清潔,感覺更衛生;由於我哋點咗西冷,餐刀都隨即轉咁扒刀;除咗西冷,我哋仲點咗一客雞卷,估唔到都幫我哋換晒啲碟。其實,服務上仲有好多細節位佢哋都有留意到,超熨貼,稍後再分享。
既然餐廳以「Bar & Grill」作定位,各式酒類自不然喺亮點,而燒烤菜式相信喺店家嘅自信出品。先介紹吓飲品一欄,雞尾酒當然喺一家酒吧嘅賣點,招牌款式又好,經典款式又好,選擇甚多,唔好酒嘅我,又可以揀無酒精嘅雞尾酒。此外,啤酒、烈酒、紅白餐酒都一應俱全。順帶一提,5:00pm-9:00pm喺歡樂時光,有買一送一優惠。
飲得酒,最好就喺有啲小食嚟佐酒,夾晌飲品餐牌中,就附上小食餐單,如各類特色薯條、炸洋蔥圈、芝士條、雞翼、墨西哥脆片……等等。所以,三幾個朋友收工後嚟短聚,飲吓嘢,啤一啤都幾唔錯。我哋都貪口痕,揀咗當中嘅炸芝士條嚟試試。
食物方面又有咩選擇呢?一紙主餐牌,分為湯品及沙律、前菜、海鮮拼盤、主菜、扒類、伴菜及甜點,選擇唔少,而且,睇落都屬精巧嘅菜式。
bowlRefreshing Passion $88
以前飲Mocktail主要都喺啲果汁、糖漿、梳打溝成,絕無酒精成份,但今次就用咗無酒精嘅酒Seedlip Spice 94嚟做,非常特別。再混入柚子蜜、熱情果糖漿、蘋果汁,襯以薄荷葉及一片橙乾,賣相非常吸晴。細味一下,酸香而帶點柚子嘅甜,感覺非常清爽,配一陣上枱嘅炸芝士條,真喺夾到爆。
bowlTropical Delight $88
表哥則揀咗另一款以無酒精嘅Seedip Garden 108酒、玫瑰糖漿、西瓜汁、蘋果汁、梳打水打造嘅特飲,再以士多啤梨及菠蘿做裝飾,同樣賣相好睇。佢話味道頗清新,但感覺少女啲喎,哈哈!順帶一提,餐廳都好支持環保,「走塑」採用咗紙飲管,抵讚。
bowl炸水牛芝士條 $78
薯條食得多,換口味試試炸芝士,況且,小弟都好鍾意食芝士。由於用上水牛芝士,所以,拉絲效果明顯,不過,水牛芝士嘅味就唔會好濃,對一般人而言,較易入口。最合心意喺咬落十分甘脆,卻喺半點油膩都無。
bowl哥頓布雞胸卷伴火箭菜、甜椒、黑松露忌廉汁 $188
食完晒啲芝士條再隔咗段短時間,就上主菜,上菜速度剛好,可見服務上都訓練有數。好耐以前有一道菜式叫「哥頓豬」,喺將兩塊鎚鬆嘅豬扒中間夾有芝士及火腿再炸香而成嘅菜式,喺好老餅嘅菜式嚟喇,估唔到今晚晌度都見到呢道菜改以雞卷「重新」出發。
雞胸卷炸得金黃,上枱時已傳出陣陣香氣,切一小件入口,外層香脆不膩,雞胸肉頗嫩滑,火腿更用上巴馬火腿,唔喺茶記嗰啲,故此夾雜芝士及火腿嘅鹹香,再沾一點黑松露忌廉汁,更能提升味道嘅層次,要挑剔嘅喺個汁可以再校淡口啲,取其黑松露嘅香氣已足夠,始終雞卷已夾有芝士及巴馬火腿。伴菜嘅火箭菜都有調過味,而甜椒喺西班牙貨色,可見製作都一絲不苟。
bowl炭烤美國頂級穀飼西冷伴香草燒新薯、時令蔬菜 $338
食牛扒最緊要喺件牛嘅質素,質素好已喺成功嘅一半,再加上好嘅烹調手勢,就事半功倍。表哥就喜歡油脂多少少,所以揀咗西冷,單喺睇外觀,碳火嘅坑紋烙印晌西冷之上,已覺得好對辦,再落刀,幾敢肯定喺上佳之作。
我哋都選上五分熟,睇睇橫切面,就見烤得恰到好處,呈粉紅,卻無半滴血水,喺手勢及經驗所煉歷而成。加上肉質本身真喺上乘,口感軟腍富彈性,又唔會有咩筋位,既有肉香,又帶油脂。佐以香濃嘅燒汁,更增加其肉香,兩人分享呢份扒就最好喇。
伴菜都唔馬虎,有香草燒新薯、法邊豆、荷蘭串茄及迷你甘筍,擺得靚靚,製作又認真,真喺食得出大廚對做菜嘅熱誠。
上文都講過,食第二道主菜時都專登幫我哋換過晒啲餐碟,嚟到甜品時段,更加換過枱臺及另一套餐具俾我哋,好好享用甜點呢!
bowl荷蘭鐵鍋鬆餅配新鮮雜莓、楓糖漿及楓糖核桃雪糕 $88
荷蘭鬆餅都曾經晌一家日式西餐廳食過,以鑄鐵鍋登場喺荷蘭鬆餅嘅標記,其實佢跟美式鬆餅做法差唔多,但點解叫荷蘭鬆餅就不得而知。賣相非常吸引,原因有二,第一就喺採用多種新鮮雜莓,唔喺「求其」一款、兩款;其次,用上加拿大楓糖糖漿,唔喺普通貨色嘅糖膠喔,仲要無手軟附上一小兜任你落,啲糖漿多到食兩份鬆餅都夠呀!
啲鬆餅焗起嚟薄身,邊位好脆口,鬆餅嘅熱,雪糕嘅凍,甚有冰火交織嘅感覺;而雜莓嘅酸香,楓糖嘅清甜,令味道更豐富,完全無違和感,滋味好食。雖然無刻意問佢哋雪糕喺咩品牌,猜佢喺Movenpick,因為以往不時去食自助餐,印象中就得呢款品牌有呢一隻口味。
都話依家啲酒吧餐廳嘅水準越嚟越高,唔喺淨飲酒嘅地方咁簡單,食物一樣好出色,就好似今晚到訪嘅「Oasis Bar & Grill」,食物質素絕無欺場,而且,環境有氣氛,服務熨貼超細心,每個細節位都做留意到,小弟真喺極少晌服務一欄俾滿分。故此,無論三五知己嚟飲吓嘢,還是一班朋友嚟聚吓餐,呢個「綠洲」都值得推薦!

個人評分
味道:8/10
環境:8/10
服務:10/10
抵食:8/10
平均每人消費:HK$430

餐廳資料:
Oasis Bar & Grill
尖沙咀諾士佛臺1號8樓
2887 9820

沒有留言:

發佈留言