2020年6月6日星期六

Brick Lane Gallery:味力「Brick」人

由於小弟都幾鍾意去旅行,窮遊見識吓呢個世界,所以,有儲開飛行里數嘅習慣,但就絕對唔會為儲里數去刻意消費。不過,有啲推廣優惠,而計落好有數嘅,就會考慮吓。最近,「Asia Miles x OpenRice」推出個「里賞餐饗週」,除Openrice本身訂座系統有里數獎,享用指定精選餐單又有額外100里,跟手用埋「運通國泰航空尊尚信用卡」埋單再送500里,咁碌呢張卡本身都有里數。晌咁多餐廳中,揀咗主打英國菜嘅「Bricklane Gallery」,一來喺未試過,二來見佢啲風評唔錯,仲有個重點喺起錶消費唔高嘛。
可能做緊個推廣關係,星期六嘅午餐時段,唔訂座喺無位嘅,排我前面幾位都喺訂咗個推廣餐,甚至後嚟側邊嘅客都喺因為個推廣而嚟。相信大家都計過數,真喺比平常消費儲里數多幾倍。鋪面,有啲戶外位,伴有好多植物,襯以小木椅,有種渡假感,但烈日當空,時值又正午,絕對唔會感到太舒服。
室內環境又點?感覺有啲英倫復古風,木地板、高身吧位、梳化位……都顯得型格,昏暗嘅燈光,甚有氣氛。不過,枱與枱之間非常之密,枱上所插嘅膠檔對防疫都好有限。而最大問題,喺廚房門大開,室內嘅抽風都一般,雖然,無話彌漫一片油煙,但絕對感到嗰陣油煙味。老婆亦話坐到中段,雙眼都感到有啲澀。
雖然,餐廳嘅名物喺Egg Benedict、All Day Breakfast,但今次到訪純粹喺試佢哋聯乘嘅精選套餐。佢哋一向都有供應午餐,但今次嘅精選套餐睇落確喺幾抵,包餐湯、前菜(沙律或烤百吉包)、主菜(3揀1)、甜點及餐飲,定價都喺$168 +10%。
bowl每日湯之選
是日餐湯喺周打蜆湯,伴上意大利香草包(喺小弟頗為喜愛嘅包款之一)。個湯質感濃稠,而且,用料十足,湯內有唔少蜆肉;而個香草包軟綿,甚有香草香。老實講,單喺呢個組合,已經可以好飽肚,所以,打後嘅主菜,老婆只食到半份,剩低嗰啲由小弟包底。
bowl烤雞肉凱撤沙律
喺精裝版嘅凱撒沙律,但其實啲羅馬生菜已經沾咗醬汁,其他基本元素,如煙肉碎、烘麵包粒,梗唔少得。咪睇外表平平凡凡,味道確喺唔錯,生菜好爽脆,烤雞肉切成粒,方便入口,兼且肉質都算嫩口。
bowl煙三文魚牛油果烤包
麵包選取百吉包,輕輕烘過嚟,塗上牛油果蓉,再鋪上煙三文魚,食味鹹香清爽。但實情唔止咁,煙三文魚下,仲混入青瓜粒、紫洋蔥、蕃茄粒、火箭菜,味道及口感都變得多元化。一客仲有成3件,若以一個人嘅套餐而言份量可不少喔!
bowl香煎紐西蘭肉眼
雖然無註明肉眼重量,睇落應有10安以卜上,絕無將貨就價之感。一大件肉眼,選上五分熟,除伴有好多薯菜:炸新薯、烤青瓜、烤意大利黃瓜……等等,以及一小件傳統嘅約克郡布甸,感覺夠晒大堆頭,啱晒嗜肉嘅朋友。
啲紐西蘭肉眼確喺有質素,肉味濃郁,煎得外層有陣陣焦脆,內裡恰到好處,唔會太生見血,肉汁豐盈。要挑剔嘅喺,稍稍多咗啲筋位。
bowl香煎鱸魚
老婆就揀鱸魚,餐牌就咁寫住香煎鱸魚,有咩伴菜嚟到先知,但單喺賣相亦有啲驚喜。整件鱸魚柳非常大件,冚晒成隻碟咁滯,煎得金黃,未食都感受到嗰入香脆感。果然,鱸魚入口外層極為香脆,無半點油膩,而且,肉質嫩滑細緻,喺具質素嘅食材。
伴菜方面,咪以為得面頭炷菜,原來下面有蕃薯蓉,打得軟滑香甜,極濃嘅蕃薯味,老婆大讚好食。
bowl朱古力雪糕
套餐有兩款甜品供選擇,我哋兩個人就自不然揀晒兩款,可惜,落單時已話無晒「紅絲絨蛋榚」(咁早就無?),只以普通嘅朱古力雪糕代替(我見佢門口嘅凍櫃擺放有其他蛋糕)。雖然,唔知雪糕喺咩品牌,但食落都覺得唔喺啲平價嘢,朱古力味香濃,質感挺身且富奶香。
bowl特濃朱古力蛋糕
另一款喺指定嘅特濃朱古力蛋糕,賣相頗為精緻,一層間一層,做法花咗多點時間。食落似美式蛋糕嘅「布朗尼」,不過,加入軟朱古力漿層,所以,入口朱古力味超濃郁,而口感挺實。
bowl香濃朱古力 +$20
呢杯熱朱古力喺店家嘅招牌,不過,老婆話早知連甜品都轉埋朱古力雪糕,仲要額外加$20,加上食到咁飽,就寧願點番普通熱茶。但喺,佢都讚杯朱古力好似,香濃幼滑,加埋拉咗花,又伴咗一串綿花糖,更要加佢分啦。
bowl香橙拿鐵 +$20
拿鐵一向喺小弟心水,而香橙拿鐵唔喺咁經常見,所以,更要試試。杯拿鐵唔喺就咗唧啲香橙糖漿,而喺加片香橙乾,賣相自然更好睇。佢哋啲餐飲寧舍大杯,伴甜點可以慢慢嘆。而杯拿鐵沖得頗香醇,帶微微橙香,口感均勻。
食材方面,確喺用上靚料,而就算咁抵嘅套餐,都無將貨就價,亦睇得出師傅做菜手勢好,單以食物質素而論,喺高性格比。環境其實亦唔錯,喺廚房嘅油煙湧出堂座要扣分;而推廣套餐嘅客人均需要訂座,當日應該全院滿座,因為有啲無訂枱嘅客人都只好被拒門外,但一早就無晒「紅絲絨蛋榚」,人手亦見緊拙,明顯準備有啲不足,喺另一個扣分位。

個人評分
味道:8/10
環境:7/10
服務:7/10
抵食:9/10
平均每人消費:HK$210

餐廳資料:
Brick Lane Gallery
尖沙咀棉登徑17-23號地下
2721 0628

沒有留言:

發佈留言