2020年6月13日星期六

鴻淘士多‧羅太豆花:最佳攤抖「豆」口

死佬中有啲單車熱血狂熱份子,天氣有幾熱都照出車,小弟今日掹車邊跟埋佢哋踩單車,路線由大埔、太和、粉嶺、上水,一直踩到去羅湖,真喺隔條河就上到深圳,仲晌埋大水管度打卡。唔好以為好遠,原來個半鐘左右就搞掂。回程時,老友話點都要到「鴻淘豆品廠」打一打躉,參觀豆品廠?原來,佢哋另設零售,一個價任飲豆漿,任食豆腐花,兼可以抖抖回吓氣。
查實位置真喺幾偏僻,若非友人嚟過不下數十次,小弟真喺唔知有呢家隱世「豆花店」。雖然大熱天時,但坐落都唔會大汗疊細汗,皆因地方大,空間寬敞。
標題都講咗「豆花放題」,俾低$14,會由店員裝碗豆腐花俾你,之後,再食豆花,定斟豆漿飲,就用番呢隻碗。一旁已備有薑汁糖水及黃糖,而冰涼豆漿亦放晌度任斟。
我哋踩單車過嚟,當然有啲熱,友人就推介豆花溝豆漿,因為啲豆花都幾熱,而豆漿又幾凍,一下子貫啲凍豆漿落肚,心怕對腸胃唔喺幾好,兩溝再加啲糖水就啱啱好。
bowl豆腐花
唔好諗住14蚊任食就俾啲次貨你,人哋做得批發,當然打算長做長有,所思,豆腐花嘅質素一啲都無欺場。既有豆香,又滑溜,糖水加咗薑煮,薑味十足卻唔嗆喉。
bowl豆漿
喺時間補充番水份及糖份,飲碗冰凍嘅豆漿就一流喇,啲豆漿應該喺無糖,所以,一定要落少少糖漿先啱味。豆味好濃郁,又夠凍,飲完一碗,真喺整個人涼透心。
另一邊,仲有個「開放式」廚房,製作小食、麵食,所以,嚟到嘅人都唔喺個個諗住淨喺食豆花、飲豆漿。
有啲咩小食、麵食,一個小餐牌睇晒,其實,又幾多選擇喎,若非仲要踩單車返大幫,真喺想整配豬手一丁呀。麵食就唔好喇,小食就嗌少少嚟「些牙」吓。
bowl燒賣 $10(6粒)
賣得呢個價,都估算喺來貨嘢,所以,都唔好太大期望,當過吓口癮,墊吓肚就無妨。幸而,都唔太差,至少唔喺嗰啲勁溝粉嘅貨色。
bowl魚蛋 $10 (6粒)
魚蛋始終喺大家至愛,所以,嗌咗兩客。啲魚蛋大大粒,幾彈牙,但魚味呢?亦唔好抱太高期望,但亦唔失禮咁啦。
bowl豆卜 $30
既然人家本身喺豆品廠,所有豆類產品都喺自家製,故此,小食方面亦唔好錯過其炸豆卜。豆卜炸得香口,又唔油膩,沾點甜酸醬,更去油膩感,着實唔錯。
多謝死佬領軍,帶小弟踩咗呢條好玩又唔太難嘅路線,又到過幾個打卡「景點」,連邊境都去埋,小小相片同大家分享吓。
由於仲要踩返單車返大埔,所以,唔方便食咁飽,呢餐就當喺輕怡午餐,返到大埔就再整個下午茶先。

個人評分
味道:9/10
環境:6/10
服務:7/10
抵食:10/10
平均每人消費:HK$14

餐廳資料:
鴻淘士多‧羅太豆花
上水上水河上鄉快景路Lot 1049
2673 6234

沒有留言:

發佈留言