松山素食 Chung Shan Veggie：「松」心所欲

中環搵食一向都唔平，就算晌快餐店，除一啲特價飯之外，基本起錶價都喺四十以上。但最近先留意到食友嘅食評，原來上環有家素食店「松山素食」，外賣嘅飯盒都只喺三十零蚊，而且，食友仲話份量十足。青綠色門面好易認，雖然叫晌上環，但小店位處都算挨近中環尾，晌中環返工嘅我，都覺得值得走遠少少過嚟試吓。

小店都有堂食架，不過，店員就話疫情關係，就不設堂食喇，況且，店內地方確實唔喺好大，如果枱與枱之間要保持1.5M距離，就真喺只擺到一枱咋，哈哈！

不過，就算有堂食，都喺外賣為上策，因為，外賣比起堂食真喺平一大截。而外賣自取價，兩餸飯賣$30，三餸飯都只喺賣$33，仲送埋老火湯，咁平，去邊度搵，怪不得食友叫我早啲去，否則就大排長龍。

至少選擇方面，會喺日日都唔同，但基本上都有6款素食餸菜供選擇。而所有餸菜都晌門口隔住玻璃一眼睇晒，仲留意到店家都好講求衛生，望落都乾淨企理。晏晝一餐，順便預埋今晚。

健康素食三餸飯（一） $33

6款素餸中，小弟就揀咗豉汁欖菜炒涼瓜、粟米茸滑豆腐及清炒菜心，飯、餸分開裝，而且，埋得滿滿，份量十足。食素就唔一定好寡，就好似個豉汁欖菜炒涼瓜，非常惹味，當然，唔食涼瓜就當別論，啲豆腐又好滑溜；

白飯又加入少少紅米，因為唔喺加好多，所以，唔食開糙米、紅米嘅人都應該唔會唔慣。不過，挑剔位就喺今次啲飯加多咗水，未至於爛，但就口感腍咗啲。

健康素食三餸飯（二） $33

另一兜就預俾老婆試嘅，素菜揀咗豆瓣醬翠玉瓜炒素肉、鮮茄炒蛋及清煮南瓜，三款餸菜都喺合佢口味。尤其個豆瓣醬翠玉瓜炒素肉，初頭唔講，真喺以為午餐肉，炒得仲有啲鑊氣感，而炒蛋亦啱啱好，唔會太過老，至於啲南瓜，雖然喺清煮，但正正食得出南瓜嗰份清甜原味。

沙參玉竹雪耳淮山湯

今日嘅「例湯」都唔喺「求求其其」，雖然喺素湯，出奇哋唔會淡茂茂無乜味，而且，喺真材實料嘅好湯水。

星洲炒米 $38

除咗三餸飯，據店員介紹每日仲有一款廚師推介，是日就喺素食版嘅星洲炒米，唔知用咗素肉做嘅星洲炒米喺點？咁就不如試埋啦。個「星米」都落咗好多料，食落素肉嘅感覺都唔錯喎，最緊要喺啲米粉唔會炒到碎濕濕，但就比一般慣常晌茱記食到嘅辣，此外，再少啲油就更健康喇！

由於每日都有6款素菜可供選擇，有清淡嘅，有惹味嘅，難得晌中上環區都定價咁相宜，所以，食起嚟都可以從心所欲，唔使就住就住咁。

個人評分
味道：8/10
環境：6/10
服務：8/10
抵食：9/10
平均每人消費：HK$33

餐廳資料：
松山素食 Chung Shan Veggie
上環蘇杭街10號啟豐大廈地下4號舖
2661 0088