2020年5月16日星期六

正點心:「正」治不正確

早一個星期前,因事同老婆出到尖沙咀,所以,午餐就專登同佢去食壽司;呢個周六,無咩特別事,唔會點出街,但晏晝都專登落咗去食點心當午餐,因為又喺好耐無食過喇,老婆嘅點心癮起,故此,就去咗區內嘅「正點心」。雖然,知道呢間嘢都開咗一段日子,但今趟喺第一次光顧。
睇門面,睇落好似喺兩間鋪「蒸選」、「正點心」,其實喺一鋪「兩味」,同一個門口入,左右兩邊嘅裝修格局喺明顯唔同,左邊「蒸選」喺淺色木系簡約風,右邊「正點心」就喺深綠色系中國風。
晌「正點心」嗰邊,再入啲屈個彎,有少少別有洞天嘅感覺,因為裡面仲有個龍鳳小禮堂。睇天花嘅路軌,應該可以間成一個小廂房。
離開餐廳後,晌鋪面嘅玻璃窗,都發現佢哋喺有供應啲12人餐,但賣到3、4千,都唔喺平。
雖然話好似兩間鋪賣唔同嘅嘢,但基本上,你坐邊度,都可以嗌到兩邊餐廳嘅所有嘢。主餐牌就無影到,不過,晌門口就貼咗張各類菜式嘅菜譜,相信店家賣嘅嘢都喺咁多。
而午市方面,仲有午市小炒、午市孖寶、午市客飯,不過,星期六、日、公眾假期不適用。之但喺,我哋一心一意嚟食點心,所以,無供應對我哋嚟講都無所謂。
至於講到點心,一張A4嘅點心紙,就睇晒有啲咩選擇,選擇唔算多。其實佢哋嘅定價都唔平,比起同區幾家中低檔酒樓,粗略評估可以講貴兩、三乘,因為嗰啲酒樓推出好多特惠點心、乜乜孖寶之類,所以,你見正值午飯時間,都唔多客。順帶一提,茶錢每位$5,但就全日都免加一。
除咗張點心紙,就仲有一張「蒸選粉麵」,但定價都幾高吓,賣$98-$128,都用上啲貴價食材,明顯喺想走高檔嘅路線,雖然美孚都算喺中產區域,不過,就唔知有多少晌午市舍得食到咁貴。
bowl鳳凰鮮蝦腸粉 $29
早前試過啲潮式腸粉,腸粉都喺粵式啱我口味啲。眼前碟鮮蝦腸好對辦,腸粉皮拉得薄透,仲專登切成一件件,每件都包住隻大鮮蝦。的確,外皮好滑,啲蝦就極之爽口彈牙,食得出喺真材實料嚟。
bowl招牌潮州粉果 $27
晶瑩嘅外皮又薄又透,賣相就蠃晒,真喺頗吸引,加上餡料塞得滿滿,唔喺得個樣。入口外皮軟綿唔黏牙,裡面有沙葛粒、西芹粒、花生粒、蝦仁粒……等等,都令到口感豐富,整體食味感覺好。
bowl招牌蜜汁叉燒包 $28
叉燒包喺點心嘅經典之一,食蒸包亦喺考驗到師傅嘅手勢。包身鬆軟唔黏牙,啲叉燒餡塞滿包身,而個蜜汁底做得香濃,叉燒鬆化惹味,不過,剛巧咬到其中一個有嚿大肥膏,之後食另一個就無喇,老婆就嫌汁底過多。
bowl香濃薑汁千層糕 $22
最後,試試佢哋啲糕點,順便以甜點作結。一層又一層做得細緻,唔難做,但都喺功夫嘢,入口糕身煙韌而有彈力,又唔黐牙,薑味亦比預期濃,做得有水準喎。
品嚐過4款點心,個人嚟講就覺得做得有水準,不過,要跟附近啲酒樓競爭,唔喺件易事,一來點心選擇相對少,二來價格相對高。其實,店員嘅服務唔太差,但餐廳明顯喺對防疫漠不關心,唔會為客人量體溫,整個環境更無任何間隔措施,故此,環境及服務兩方面就肯定俾低分,而整體評分亦被拉低晒。

個人評分
味道:8/10
環境:6/10
服務:5/10
抵食:7/10
平均每人消費:HK$58

餐廳資料:
正點心
美孚美孚新邨恆柏街6號地下N29A號舖
2388 5399

沒有留言:

發佈留言