百尚屋 101 Tasty House：貴試小食餐

雖然仍有限聚令，但保持一定嘅社交距離，又做好防疫措施，基本上一啲戶外活動我就覺得絕無問題。今趟就友人吹雞，搞咗趟欣澳、愉景灣郊遊樂，仲晌愉景灣食咗個黃昏「下午茶」。對愉景灣唔熟，都唔知有咩好食，而且，好多有海景睇嘅餐廳都已經坐滿人，仲喺無視限聚令保持1.5M距離，所以，晌番主廣場嗰邊，試咗家小食店「百尚屋」。

小店基本上喺只做外賣，不過，對出廣場就有好多枱櫈，啲枱櫈仲撐埋太陽傘，真喺唔怕日曬雨淋。不過，晌假日，就真喺一位難求，因為唔少外國人三幾個買打啤酒就打躉幾個鐘。

講番「百尚屋」，賣嘅嘢都好雜吓，有三文治、一丁麵餐、港式小式、美式小食、台式飲品……等等。而小弟所試嘅，喺其中一款「招牌推介」旋風薯圈餐。

薯圈150克、中雞翼1隻、經典黑糖珍珠奶茶 $55

單買一杯黑糖珍珠奶茶都要$35杯，呢個餐都算叫划算少少，當然，以一個小食餐，或下午茶而言，仲只喺外賣嘢，就一定唔叫得平架啦，不過，晌呢區，你食咩都唔會喺平。薯圈份量幾足，但質素就普普通通咁啦，入口唔喺熱辣辣嗰種，似似哋大量炸定，幸而都唔太油。

反而杯珍珠奶茶幾得，一來大大杯夠晒解凍，二來茶底幾香濃，又帶有黑糖嘅清甜香味，珍珠咬口好食，唔似喺啲平價劣質貨。

用餐當日仲未放寛限聚令，唔止餐廳無視，晌廣場坐嘅外國人亦都唔喺好理，都唔喺三五成群，而喺五六成群，暢飲啤酒及大聲傾偈，所以，啲咩酒吧群組點都相對喺高危啲。

個人評分
味道：7/10
環境：6/10
服務：6/10
抵食：6/10
平均每人消費：HK$55

餐廳資料：
百尚屋 101 Tasty House
愉景灣愉景廣場地下G26號舖
5638 0118