Simplylife Landmark：「簡」飲擇食

由於香港嘅疫情都仍然嚴峻，基本上自農曆年後都無出過街食嘢，早、晚兩餐都喺自家製，而午餐都喺嗌外賣晌公司食。為已為人，盡可能都減少人群接觸。今早，就因為工作開係，要早啲返到公司處理，故趁早無乜人嘅時段，一支公晌「Simplylife Landmark」嘆番一次早餐，以解解悶氣，調節一下心情。

由於一清早，真喺客人唔多，大部份嘅都喺買走，少部份堂食客都好自動坐開啲，絕大多數都喺一個人嚟，靜靜哋睇吓報紙、碌吓手機、食個早餐，所以，感覺都幾舒適。小弟就搵咗個近門口位二人枱，一支公慢慢嘆。

早餐時段，食物嘅選擇主要都喺啲烘焙產品及三文治，例如牛角包、丹麥酥、蛋批、比高圈、各式麵包、英式鬆餅、三文治，選擇非常多，全放晌玻璃櫃裡面，賣相十分吸引。

雖然唔似啲快餐店咁有啲早餐ABC套餐形式，不過，晌星期一至五，11:00am前，凡購買烘焙產品或三文治，都可以以優惠價配飲品。正就正在唔會只得基本熱飲，揀鮮奶咖啡都唔使額外補錢。

老實講，睇住個餅櫃，望落個個出品都烘得金黃，色澤閃亮，真喺花多眼亂，唔知揀邊款好。都諗咗好一陣子先揀到心水：榛子丹麥酥，再配一杯焦糖鮮奶咖啡。

榛子丹麥酥 $16

佢哋啲丹麥酥定價都唔貴，目測都喺$15-$18左右，唔算貴。而揀榛子丹麥酥，除咗因為酥皮嘅烘焙產品難做，好講手勢之外，而榛子醬亦難自己搞，晌出面食好過啦。

睇見外觀已感覺好得，件丹麥酥面面放上好多烘過嘅杏仁片，仲灑滿糖霜。大口咬落去，層酥皮真喺堅香脆，而且，充滿牛油香，加埋啲杏仁片，寧舍有口感；中間嘅榛子醬，榛子味超突出，柔滑芳香得很，絕對喺無得輸，極之好食。

焦糖鮮奶咖啡 +$15

不過，杯鮮奶咖啡就有啲失色，本以為以佢哋咁嘅格局，做杯鮮奶咖啡會拉吓花，尤其是當時嘅客人亦唔算多，不過，拉花就欠奉喇。還好嘅喺杯咖啡嘅質素都唔差，醇香，口感平均、順滑，帶點焦糖嘅濃香甜味。

依家正值非常時期，近排仲因為大量留學生回港避疫而引起第二波嘅爆發添，希望人人自律，盡量唔好人群聚集，減少交叉感染嘅機會，要是出街食嘢，最好都喺「自閉」一吓。

個人評分
味道：9/10
環境：7/10
服務：7/10
抵食：8/10
平均每人消費：HK$31

餐廳資料：
Simplylife Landmark
中環皇后大道中15號置地廣場B1地庫B32號舖
2978 3929