泰潮 Thai Chiu：平得「泰」過份

由於新型冠狀病毒疫情持續，近乎日日都有新增個案，飲食業當然一啲都唔好過。見到有酒店餐廳連外賣都有做，就知大家為保生意，都要扭盡六壬。而家下唔少餐廳都以外賣為主力，近排就見Openrice同好多餐廳合作推出好多獨家外賣自取優惠，攞過米芝蓮推介嘅「泰潮」就喺其中一家。

一來挾着米芝蓮嘅「朶」，二來個外賣自取優惠又的確非常吸引，怪唔之得門外都好多人等拎外賣。而且，門口張枱仲埋滿好多外賣等人拎。因為實在太抵食，隔咗幾日又再叫，試咗兩款唔同嘅飯品。

順手拎咗啲單張俾大家參考，有散點、、午市套餐及晚市時先供應嘅一人套餐。

第一次嘅外賣，小弟就點咗泰式滷水豬脾飯，因為個豬脾飯實在太抵，所以，梗喺要多份炸魚餅啦，同樣有半價優惠，兩樣夾埋都喺$51，仲送埋個涉。

泰式炸魚餅（4件） $20

因為個豬脾飯太抵，所以，梗喺要多份炸魚餅啦，原價$40，依家半價$20咋。啲魚餅炸得金黃，仲有啲椰菜絲、甘筍絲墊底，始終整好咗一段時間，拎到返嚟又等咗段時間，都好難仲喺熱辣香口，不過，食落就覺得唔喺啲勁溝粉貨色，卻又唔喺好爽彈，而有一陣陣香葉味，但就意外哋幾辣吓。

泰式清雞湯

買飯品仲會附送湯品，湯內有大大嚿冬瓜，唔喺睇番啲外賣單張，仲以為佢喺冬瓜湯。入口好似有微微香茅味，帶點點酸，幾清爽，喺有種泰式風味。

泰式滷水豬脾飯 $31

個豬脾飯好食又抵食，睇樣就見到飯多，餸又多，唔單喺得啲豬脾肉，除見到有半隻滷水蛋，下面仲有啲滷大腸呀、泰式鹹菜呀，份量夠晒十足，絕對無話喺自取優惠就將貨就價。豬脾、大腸都滷得極之入味，而且，豬脾肉入口超鬆化，皮下脂肪食落又唔覺好油膩。正價要$60一客，依家晌優惠下就食到，所以，咪話佢好食又抵食囉。

第二次嘅外賣就試吓佢哋嘅「米芝蓮」海南雞飯，再搭一客泰式炸春卷，今次仲平，夾埋都只不過$46。

泰式炸春卷（4件）$15
第二次再食佢啲外賣，小食就揀咗炸春卷，依然喺半價優惠，睇樣好唔錯，不過，都喺同一個問題，由製作好到拎返嚟公司，頭尾都超過廿分鐘，過晒氣，入口啲春卷唔再脆，腍晒身，但食落裡面都好足料。故此，如嗌外賣就真喺唔建議。

泰潮海南雞飯 $31

又喺原價就$60，優惠價就$31，打開飯盒一睇就知份量無欺場，配雞油飯，雞件下面墊有唔少椰菜，仲附送一小兜泰式青瓜沙律，酸香爽脆，總之，咁嘅價就抵啦。啲海南雞已去晒骨，所以，入口啖啖肉，肉質嫩滑，皮薄又無乜皮下脂肪，所以，份外清爽，沾一沾啲泰式酸辣醬，令到雞鮮味更突出。而雞油飯無想像中咁油，但又唔算話好香。

就算喺正價，都覺得OK，何況依家近乎半價嘅優惠，當然喺抵到無朋友啦。不過，啲炸嘢就唔太適宜叫外賣喇。

個人評分
味道：8/10
環境：7/10
服務：7/10
抵食：9/10
平均每人消費：HK$50（Openrice獨家外賣自取優惠）

餐廳資料：
泰潮 Thai Chiu
中環嘉咸街7號地舖
2488 4444