La Creation de Gute：自家製周末早餐

早前經過K11嘅「La Creation de Gute」，被佢啲裝潢吸引到，而第二朝嘅早餐又未諗，心諗就不如入去睇睇，有啲咩高質素麵包賣，用嚟第二朝做個豐富嘅周末早餐。

左右兩排都擺咗好多麵包款式，一時間真喺花多眼亂，先走一圈，睇睇有咩心水。

最後，發現一款頗為眼熟嘅款式，就喺店家標示嘅「Best 2」：歐陸雜果法包（$28），點解話佢眼熟呢？因為晌屋企附近間「A1 Bakery」買過，而呢款包老婆都好鍾意食，所以，印象深啲。俾錢時，問問店員，原來「La Creation」跟「A1 Bakery」都喺同屬一個集團。

$28一個麵包，平就肯定唔平喇，但就確喺真材實料，拎起嚟幾墜手。外觀烘得金黃，以法包為基礎，內裡就混有超多提子乾、莓乾、南瓜子、合桃……等等。

將麵包烘番暖就寧舍好食，咬落包面脆脆哋，包心就帶柔韌性，口感實在，跟食港式好唔同；而內裡嘅乾果粒、堅果粒，就令到個口感好豐富。再伴上一大份菌蘑粟米奄列，搭杯滴漏咖啡，成為好一份好稱心滿足嘅自家製早餐。

疫情下，已好耐無晌星期六出街食早餐，唔知呢啲日子仲要過幾時，只好忍耐一下。但只要能夠晌生活搵啲點子、花點心思，一樣可以令生活變得不一樣，唔枯燥！

個人評分

味道：8/10
環境：7/10
服務：8/10
抵食：8/10
平均每人消費：HK$14

餐廳資料：
La Creation de Gute
尖沙咀河內道18號K11購物藝術館B103舖
3122 4168