2020年1月22日星期三

The Coffee Academics:高「糕」慶慶

結婚已十多年,搞咩周年慶祝一向都喺小弟負責,今件嘅結婚周年日撞啱老婆要上堂,食飯慶祝就延遲一日,正日就先食件蛋糕預祝先。今次揀咗The Coffee Academic嘅蛋糕,一來順路經過,二來睇過佢啲蛋糕具質素。
小弟一向隨遇而安,有咩款就揀咩款,當日去到,其實剩低嘅款式唔多,晌鋪面前嘅凍櫃內一眼睇晒,共4款而已,不過,有啱心水就OK啦。
橫掂嚟到,都影埋佢哋啲價錢牌,俾大家參考又好,為自己留記錄又好。睇番啲價,其實佢哋賣嘅飲品都唔平,但風評不俗,有機會都要嚟試吓。
而早餐時段、午餐時段、下午茶時段都有啲配搭優惠,但只限星期一至五而已。
最後揀咗兩款蛋糕,以小紙盒盛載,並連同可分解嘅木叉捲起放晌盒內。一時醒唔起,叫佢哋走餐具,反正喺拎返屋企嘅,環保嘢做得幾多得幾多。
bowlBanoffee Tart $43
單喺賣相已睇得出花過心思,雖然株迷迭香喺唔會食落肚,但散發出嘅香草幽香喺多多少少提升食慾。朱古力撻殼非常鬆脆,中間嘅吉士打得軟滑,唔會有雪乾嘅問題;香蕉肉夠晒熟,再焦糖化埋就更好食,伴以合桃、果仁粒粒,真喺好得。
bowlKing of Cocoa $43
睇個名你就知喺以朱古力為主打,一層又一層間住,底層仲混有唔少合桃粒,食落極有「布朗尼」(Brownies)嘅影子。其實,實心嗰層就喺布朗尼,隔着就喺朱古力海綿蛋糕層,面頭再灑滿朱古力碎片,所以,入口朱古力味極濃郁,卻唔會太甜,而口感亦夠實在,所以,鍾意食「布朗尼」嘅朋友,都無乜理由唔鍾意呢一款「King of Cocoa」。
兩款蛋糕都做得出色,確喺高質,可講喺物有所值,最緊要都喺老婆都鍾意嘛!再擇日,食餐特色菜嚟補祝結婚周年。

個人評分
味道:9/10
環境:8/10
服務:8/10
抵食:8/10
平均每人消費:HK$43

餐廳資料:
The Coffee Academics
尖沙咀廣東道3-27號海港城港威商場2樓Kiosk 1
3100 0082

沒有留言:

發佈留言