山區裡的走走趯趯: Tapa Room：實力西班牙「小食」店

2020年1月10日星期五

Tapa Room：實力西班牙「小食」店

當時到訪「Tapa Room」，最後嘅印象喺驚喜「小食」店，當然，小食啲意思唔喺講港式嗰啲啦，而喺西班牙小食Tapas。近年，西班牙小食確喺幾火紅，唔單止好食，仲頗有地道特色。最近，「Tapa Room」開到嚟牛頭角，就晒我哋啲九龍人啦。

雖然餐廳位處牛頭角，非傳統搵食地區，但原來離牛頭角港鐵站5min左右步程，起咗幢新商廈ITT，餐廳就晌地鋪，故鋪外設有啲露天位，對出嘅內街亦非常方便泊車，好適合揸車嘅客人。由於門口裝咗好多霓虹光管，非常搶眼，所以，晌街口就一眼認出餐廳。對比銅鑼灣店，最大特色喺將水吧枱設晌室外與室內之間，可以同時招呼區。

而另一分別，就喺呢度地方大好多，不過，卻無話用盡每吋空間用嚟擺餐枱，加上樓底亦唔矮，故此，空間感好足，裝修就保持一貫嘅型格，又喺掛起「食鬼」嘅霓虹光。

甫坐低一陣，店員就遞上餐牌作出介紹，我哋話，其實我哋都到訪過銅鑼灣店，哈哈！先講講飲品餐牌，好認得啲Tanqueray系列嘅飲品，此外，仲有多種特色烈酒配搭、西班牙水果酒、雪莉酒、紅白餐酒、啤酒、汽水、果汁……等等。

而食品方面，主打就喺多款冷熱西班牙小食（Tapas），數一數有成16款之多，定價亦都唔貴，此外，4款主菜、2款伴菜、2款甜品，組成整個食物餐牌。

White Sangria $45 HH / $60 NH

同上次一樣，小弟都喺鍾意白酒版嘅西班牙果酒（Sangria），以白酒取代紅酒，並加入青蘋果、荔枝、熱情果元素，色澤如香檳嘅金黃色，晶瑩剔透，非常之易入口，陣陣清涼帶果香，繼而散發出一股微微酒勁。友人飲嘅就唔多講，因為評酒真喺唔在行。

落好單，就等開餐，枱上插滿餐紙巾，而原來啲餐具就放好晒枱邊嘅抽櫃，抽櫃嘅間格亦睇得出喺特別訂做。我都幾鍾意呢種設計，方便客人嘛，唔使為一件半件吓吓揚手搵侍應。不過，啲侍應都好專業，服務細心，添水換碟亦好自動波。

血橙燒牛肉沙律 $58

血橙喺西班牙嘅特色食材，無理由唔試，先上一客血橙燒牛肉沙律，賣58蚊，比預期大份喎。簡單嘅沙律菜墊底，然後放有血橙片、燒牛肉條，最得意喺撒上啲脆片，食起嚟清新，又有啲脆卜卜感，牛肉亦燒得軟腍，喺幾好嘅開胃前菜。

蟹肉及辣忌廉芝士釀烤甜紅椒 $98

甜紅椒亦喺西班牙出名嘅靚食材，無論睇菜名，還是睇賣相，都知道菜式喺咩一回事。啲甜紅椒非常大隻，裡面塞滿蟹肉，並混入忌廉芝士，而紅椒烤到軟化晒，入口陣陣清甜味，蟹肉跟芝士，溶入口腔中，軟綿好食，唯挑剔位喺面面灑多咗黑椒碎，少番啲就更平衡。

西班牙黑毛豬肉丸伴烤甜椒醬 $78

唔使小弟講，都知黑毛豬喺西班牙嘅名物，近年都已經大為普及。呢道肉丸以黑毛豬入饌，外表雖然平平無奇，但肉丸搓得鬆化有咬口，底下嘅甜椒醬好清甜，面頭加咗少少酸忌廉更喺有畫龍點睛之效。

鵝肝比堅尼三文治 $78

有食開西班牙菜嘅朋友都知「比堅尼」喺西班牙小食中幾常見嘅菜式，話喺三文治，但比一般西式嘅三文治薄超過一半，烘過後，就更脆口；麵包內夾有鵝肝醬，份量恰好，甘腴卻又唔會太「漏」。

西班牙肉腸卡邦尼扁意粉 $138

怕淨喺食「小食」唔夠飽（其實喺唔會），幾款主菜絕對可以填飽你個肚。卡邦尼意粉食過唔少，西班牙版本喺點呢？其實主要喺以西班牙肉腸代替煙肉，同樣充滿油香，而忌廉汁底啱啱好，扁意粉夠晒咬口，份量又足。

西班牙黑毛豬鞍架伴些厘醋燒汁 $158

試咗個西班牙黑毛豬肉丸，意猶未盡，嚟多一個西班牙黑毛豬鞍架嘅主菜。件豬鞍架非常大件，又厚身，燒得非常靚仔，甚有碳燒嘅感覺。落刀之時已感到啲肉好鬆化，咬落仲有微微爽脆感，喺呢種豬鞍嘅亮點，沾上些厘醋燒汁，口感更清爽，完全無油膩感。事後跟侍應交流，佢話呢種豬鞍可以煮生啲，口感仲正，但怕香港人唔喺太接受到豬肉只煮到嗰種7乘嘅感覺。