奇華餅家 Kee Wah Bakery：應晒節卡通攢盒

農曆新年，以香港人嚟講都算喺大節日，細個嗰時都有跟家人去辦吓年貨，但隨着人越嚟越大，好多傳統嘢都越嚟越簡單，就好似「攢盒」咁，咩糖冬瓜、糖蓮子、朱古力金幣、瓜子……等等，已經無搞好多年，尤其是依家家中只得兩公婆，又唔會有人嚟拜年，就變得一切從簡。咁點簡法呢？咪索性買啲「現成」嘅「攢盒」囉，而今年就揀咗「奇華餅家」嘅「Sanrio Characters 糖果禮盒」，雖然我哋唔喺呢款卡通嘅粉絲，但就貪佢得意可愛，紅噹噹夠應節。

6個小罐都印有唔同嘅人氣角色，個個嘅造型都可愛別緻，並刻有唔同嘅賀年祝福語，加埋底下嘅天然竹纖維托盤，放埋一齊好似朶大紅花，真喺喺一套超讚嘅賀年應節攢盒。而打開晒所有盒蓋睇睇，裡面基本上放有3款賀年糖果，其中嘅南棗合桃糕更喺老婆至愛。

老薑糖

粒粒都喺獨立包裝，可以慢慢食，而每粒都沾滿椰絲，咬落柔韌，卻唔黏牙，口感不俗，而且，薑味突出，仲有少少辛辣感，誇張啲講句，喺一種暖胃驅寒感呀。

南棗合桃糕

唔止老婆鍾意食，都好啱小弟口味。南棗合桃糕嘅口感煙煙韌韌有層次，南棗味又濃郁，內裡加入好多合桃粒，極之有咬口，甜中帶點苦，加上有點養生保健之效添。

芝麻花生軟糖

叫得軟糖，就唔會「硬掘掘」啦，粒芝麻花生軟糖包住勁多花生粒，保持脆口，而且，又沾滿好多黑白芝麻，甚富芝麻香，好易食唔停。

最後，攢盒嘅嘢都成為我倆嘅零食，所以呢，話就話應節，其實又只不過喺牙痕自己想食而已，哈哈！另外，啲卡通小罐無嘥，有啲俾咗喜歡呢個卡通系列嘅朋友，有啲就自用擺放文儀用品，如萬字夾、釘書釘……。

個人評分
味道：9 /10
環境：- /10
服務：- /10
抵食：- /10
平均每人消費：HK$38

餐廳資料：
奇華餅家 Kee Wah Bakery
葵芳興芳路223號新都會廣場2樓229-231號舖
2424 6818