2020年1月7日星期二

金鶴拉麵 Kane Tsuru Ramen:博「鶴」多才

是夜過到嚟炮台山攞番啲嘢,估口到又好順利,老婆上堂,得一支公,順利成章食埋先返屋企。晌周圍兜吓兜吓打個轉,見到「金鶴拉麵」,大概大半年前晌中環店試過,印象幾好,見其口碑一直都唔錯,故此就食碗拉麵先閃。
餐廳位處蜆殼街,屬旺中帶靜嘅地段。而走進入內,對比起一般嘅拉麵店,裝修上明顯型格得嚟,甚有高級日本餐廳嘅感覺,柔和嘅燈光,舒適嘅空間,一大幅金碧輝煌嘅金鶴圖,突顯其高雅感。
主餐牌印刷精美,黑底襯上食物圖片,夠格調,翻開內頁,有各款拉麵、沾麵嘅介紹、人氣嘅活燒蒲燒鰻魚飯,此外,仲有多款餐前 / 佐酒小食,招牌小食。尾嗰幾頁,就喺啲手工啤呀、清酒、吟釀……等等。
另外,大概想吸引更多客人,加設咗串燒添,有近30款,睇落定價都OK,不過,翌日晚就約咗人食串燒,所以,今晚就無試住。
仲有就喺,佢哋兼賣Bless嘅冷壓果汁,算做得幾成功嘅品牌,標榜100%天然,無人造色素,無化學成份。
bowlBless雪梨汁 $28
除咗拉麵,亦想試其炸雞,再加上近日天氣確喺有點乾燥,所以,倒不如揀支雪梨汁嚟潤吓。先小喝一口,陣陣清爽嘅感覺,雪梨味清甜天然,糖度亦嚟得自然,而且,有更微微果肉。
bowl日式唐揚炸雞 $38
一客有3大件炸雞肉,炸得金黃,充滿油香,一口咬落去,外皮非常脆口而唔油膩,雞肉則十分嫩滑,雖然,碟邊有啲海鹽,但根本唔使點啲肉都好入味,幾有驚喜嘅一道炸雞。
bowl醬油拉麵 $88
上次已試過佢哋嘅雞白湯拉麵,加上今回點咗客炸雞過口癮,故此,麵條就揀咗款清清哋嘅醬油拉麵。一般拉麵都喺配日式叉燒,但佢哋就加多咗日本赤雞雞肉,再加埋幾款基本配料:溏心蛋、黑木耳、洋蔥、筍乾及紫菜,整碗嘅份量變得唔嘢少。
「醬油」咪以為就咁清水加啲醬油,餐牌都有寫到明喺鰹魚高湯,再加入日本醬油調味,色澤清澈。小呷一口,感覺確喺幾清爽,多飲幾啖,就會嗒到味道中嗰份細緻。再試試麵條,有韌勁,又唔易腍,食到尾都仲咁有咬口,而且,份量喺睇唔出咁多。
兩大片雞肉,都喺低溫慢煮嘅日本赤雞,唔單止肉質細膩嫩滑,仲甚有雞肉味。而我幾鍾意佢哋嘅叉燒做法,就喺極少肥肉,但喺,咬落卻又唔會好韌,仍有嗰份鬆化感。
暫時嚟講,印象中都未試過遇到拉麵店啲溏心蛋喺唔得嘅。「金鶴」嘅溏心蛋睇樣都見唔差得去邊,半凝嘅蛋黃咬落好有蛋香。
服務方面幾好,招呼我嘅妹妹仔,有禮,就算我要咗支冷壓果汁,都不時為我添上熱茶,抵讚。有時啲餐廳做大咗,多起分店嚟,水準就會不穩,甚至下跌。雖然只喺試咗佢哋嘅炸雞及醬油拉麵,但水準無話點差到,兩者都覺得好食,值得再捧場。有機會就試埋佢啲串燒,就睇到阿大廚喺咪瓣瓣掂咁博學多才!

個人評分
味道:8/10
環境:8/10
服務:9/10
抵食:8/10
平均每人消費:HK$170

餐廳資料:
金鶴拉麵 Kane Tsuru Ramen
天后炮台山蜆殼街6-16號寶榮大廈地下E號舖
3460 2398

沒有留言:

發佈留言