雖然我貼咗個晚餐餐牌出嚟，但我哋就唔喺點晚餐，喺「被」散叫。事緣我哋大概5:50pm入座，侍應A放低個主餐牌（即喺散點餐牌），大概10分鐘後，落單點餐，之後才見到隔離枱有張晚餐餐牌。晚餐嘅食物當然比散點嘅平少少，亦有唔少加配嘅優惠。當我哋向侍應B查詢，只喺查詢啫，佢已經即時強調要6:00pm先可以擺晚餐餐牌出嚟，因為落咗單喺唔可以改（就算未出食物）。我嚟食生日飯，唔想被啲咁嘅服務影響自己心情，只喺覺得啲管理可以好啲囉，你落茶記，去快餐店，阿姐未夠鐘都換定啲下午茶餐牌出嚟啦。再者，我落單時喺5:59pm，因為佢有張落單紙俾番個客，有常理嘅侍應都會提一提啲客。
炸珍寶蟹棒＆芝士年糕配日式蛋黃醬 $48
賣得48蚊，你就唔好諗裡面喺有真蟹肉啦，唔喺嗰啲好粉嘅劣貨蟹棒我都OK架喇，再者，炸得金香脆口，又唔喺好油；之但喺，啲日式蛋黃醬絕對喺就咁唧出嚟嘅沙律醬，無搵蛋黃搓碎混合過，唔收貨啦。而芝士年糕嘅芝士部份好綿密，但年糕部份唔知何解好似未夠煙糯。
扒虎蝦芝士汁鮮蛋意大利麵 $95
晌餐牌中，有好多意大利麵款式，而其中有一系列嘅芝士汁鮮蛋意大利麵比較吸引到我，所以，當中就揀咗扒虎蝦。
賣相幾靚仔，仲刨咗啲巴馬臣芝士落去。咪睇佢樣好似好大碟，其實現場睇實物份量唔算多，女生無問題，男生可能唔喺太夠。
不過，啲鮮蛋意大利麵真喺好得，咬口而有蛋香，單喺睇色澤鮮黃有力已覺得好唔同。個汁又調得啱啱好，厚薄適中，唔會太黏、太杰，有芝士香。
虎蝦唔喺話超大隻嗰啲，但煎得爽口、彈牙，又足蝦鮮味，用料着實不賴。不過，都喺覺得啲鮮蛋意大利麵至喺亮點。
黑松露雜菌春雞燴意大利飯 $98
我不時都話，意大利飯喺最能試到個煮嘅手勢，因為要煮到啲飯粒有煙韌感，但又唔會有種好生嘅感覺，確實喺唔容易。故此，揀嚟呢一道燒春雞燴意大利飯，又可以試埋啲春雞得唔得。
春雞嘅外觀燒得極具吸引力，而且，相對碟意大利麵，個飯嘅份量就足啲。
先試啲春雞，剛好半隻軋為兩件，老婆就醒我食隻脾位，食味的確一流，外皮焦脆唔油膩，雞肉滑嫩非常，夠入味；不過，老婆所食嘅雞胸位，就明顯比下去，入口確喺有少少嚡。
飯粒單講口感，煮得恰到好處，有煙韌感，又夠濕潤，既有松露嘅香氣，又有芝士嘅鹹香，啲雜菌亦食得出唔喺罐頭貨。之但喺，最敗筆喺個飯過鹹，小弟都算喺較為食得鹹嘅人，都覺得偏鹹。
朱古力花生醬焦糖香蕉厚焗鬆餅配杏仁雪糕 $58
既然生日飯，當然要嗌埋道甜品先夠滿足啦，甜品選擇唔少，但厚焗鬆餅喺今次嘅心水。4款鬆餅中，焦糖香蕉較啱老婆口味，同埋做起嚟較花巧。
嚟到嘅成品，果然跟足餐牌個樣，以朱古力及花生醬晌碟面畫上粗線紋，好有美感；香蕉嘅焦糖化亦做得相當出色，薄脆焦香，整體嚟講，跟餐牌嘅賣相一樣。
厚焗鬆餅嘅質感確喺唔錯，外層有點脆，餅心軟綿綿，最鍾意喺朱古力漿同糖漿都可以自主落幾多就淋幾多，再伴一小件焦糖香蕉同軟滑富奶香嘅杏仁雪糕，一啖放入口，滿足感爆燈。不過，花生醬嘅元素就真喺丁「點」到即止！
鮮奶咖啡 $26
一早已諗定配甜點就要番鮮奶咖啡，但見佢一杯鮮奶咖啡只賣$26，都諗住可能喺全機沖嗰隻，但送上成品，真喺喜出望外。唔單拉花靚，花紋細膩，圖案對稱，入口更喺均勻柔滑，咖啡味醇香，真心抵飲。
若非晚餐餐牌一事留下少少唔好印象，服務一環應該喺幾好；順帶講埋，落單前先問清楚喺咪喺可能儲里數，但個侍應A問過好幾個人先肯定可以儲，所以，可見管理方面仍有好多改善空間。而食物嘅綜合嘅打分，亦因為個炸嘢及意大利飯拉低咗分，否則，喺一頓完美嘅生日飯。故此，整體嚟講，仍有好多位要執一執漏。
個人評分
味道：7/10
環境：7/10
服務：6/10
抵食：7/10
平均每人消費：HK$180
味道：7/10
環境：7/10
服務：6/10
抵食：7/10
平均每人消費：HK$180
餐廳資料：
HeSheEat
荃灣蕙荃路22-26號綠楊坊地下G15-16舗
2793 1688
HeSheEat
荃灣蕙荃路22-26號綠楊坊地下G15-16舗
2793 1688
沒有留言:
發佈留言