Espresso Alchemy：慢活早午餐

呢一日，約咗啲弟兄行城門水塘，咁啱老婆又約咗啲姊妹飲茶+食晏，得番小弟一支公，所以，就趁行山前食個早午餐，一餐頂兩餐。出咗荃灣西站，諗住行過去荃新天地打個轉，睇睇有咩選擇，就晌經過如心廣場時，見到地鋪有家「 Espresso Alchemy」，曾經光顧過知道其水準，加上一心打算嘆吓咖啡，呢道都算合晒心水。

荃灣店嘅環境比尖沙咀店無咁分割，一眼睇通晒，裝修簡潔明亮，又一室以白為主調，走摩登路線。加上對外一面喺落地大玻璃，透入自然光，更感活力。

拎本餐牌埋位慢慢研究，睇睇呢個時段有咩揀。晌首頁，見有張獨立嘅菜單，只喺周末及假日供應嘅「All Day」，但事後再睇埋主餐牌，除咗個「如心全日早餐」之外，其他菜式晌主餐牌都有，價錢亦喺一樣。再詳細問店員，就算揀呢個餐牌嘅菜式，亦無飲品優惠，故此，呢個唔喺套餐嚟。

而主餐牌，先喺啲特色飲品，再落嚟就仲有多款咖啡、手工啤、朱古力、茶品、鮮奶及梳打……等等。

食物方面，跟尖沙咀店有少少唔同，包括沙律、三文治、多士、漢堡、意大利麵及意式三文治。

晌櫃枱落好單之後，侍應會根據你取得嘅號碼牌送上食物，亦順便擺上餐具，而餐廳卻無收加一服務費嘅。

鮮奶咖啡 $41

嚟到「 Espresso Alchemy」嘆咖啡，真喺唔使點擔心。睇見咁手工嘅拉花，天鵝嘅花紋咁細緻，已感覺差唔得去邊。小呷一啖，完全晌無攪過情況下，已飲得出嗰份均勻感，喺撞奶泡手勢夠好，而咖啡醇厚帶微微果仁香，故此，口感及味道都極具水準。

青醬烤雞意大利三文治 $66

本想點客虎蝦意粉，但始終等陣就行山，費事食得太飽，就嗌咗份輕盈啲嘅意式三文治。麵包烘得一格格，拎上手都幾熱辣吓，入口麵包烘至外脆內軟，而裡面混有好多香草醬、莫沙里拉芝士及蕃茄片，味道清爽卻富層次，雞肉亦比預期中嫩滑，用料不賴。

香蕉蛋糕 $28

雖然有點矛盾，但意猶未盡，追加多一客香蕉蛋糕。外層帶丁點焦脆，而裡面保持濕潤，口感實在，香蕉味好濃郁，襯住杯鮮奶咖啡，已經喺一種好好嘅享受。

吃罷個早午餐，仲有點時間剩，晌個窗口位，享受微微日光，打打稿子，覆覆短訊、電郵，無拘無束，喺好嚮往嘅慢活生活。

個人評分
味道：8/10
環境：9/10
服務：8/10
抵食：8/10
平均每人消費：HK$135

餐廳資料：
Espresso Alchemy
荃灣楊屋道8號如心廣場商場一期地下G02號舖