山區裡的走走趯趯: Cali-Mex Bar & Grill：「墨」超所值

2020年1月23日星期四

Cali-Mex Bar & Grill：「墨」超所值

之前講過結婚周年日撞正老婆返學嘅日子，就暫時買件蛋糕嚟預祝一下，再擇日食餐特別菜。結果，翌日就嚟到尖沙咀嘅「Cali-Mex」食墨西哥菜，算特色喇啩，因為，平常真喺好少揀墨西哥呢個菜系，而小弟食墨西哥菜嘅次數亦喺一隻手掌數得晒。

小弟之前去過啲墨西哥餐廳，晌裝修上花咗唔少心思，頗有墨西哥色彩，但「Cali-Mex」就唔算太濃烈，主要都只喺整幅牆身畫上中美洲嘅風情。

其實餐廳嘅格局好深，再入啲，一室紅磚牆，牆上畫有美國公路嘅數字標誌，反而覺得有種美國西部風情。而我哋就被安排坐晌餐廳中間位嘅卡位，既闊落，又舒服。

因為餐廳同時定位為一間酒吧餐廳，當然有唔少酒賣，而且，更晌卡位設置自斟啤酒機，讓客人可以食住墨西哥粟米片，一路暢飲。只不過，我同老婆都不好此道而已。

啤酒唔啱，但嘢食就有好多選擇，有前菜、沙律，以及種類極多嘅墨西哥美食；此外，更有美國牛扒、漢堡，多款主菜；揭到最尾一頁，竟然仲有全日早餐添，而餐牌有晒圖片參考，色彩鮮明奪目，夠晒熱情，充滿活力，睇落都非常吸引。

主餐牌外，枱上仲有一大張硬餐牌，一版印刷非常精美，喺十多款賣相精緻嘅特飲，另一版就列列埋其餘飲品，當然絕大部份都喺酒精類，而非酒精嘅概略就佔所有飲品1/8左右。

加洲科布沙律 $108

3款沙律中，好似呢款幾特別咁，餐牌雖然寫晒有咩材料，但有部份都唔喺好知咩嚟，所以，決定冒吓險試試。沙律上到枱，猶如中美風情，色彩艷麗，內有脆炸煙肉、牛油果醬、蕃茄洋蔥粒、烚蛋及大量羅馬生菜。將所有材料撈均後，一羹入口，生菜好爽脆，並拌以藍芝士醬汁，味道鹹鹹香香；煙肉、牛油果醬、蕃茄粒、洋蔥粒，都令味道變得好豐富。