深宵食堂：「深」滿意足

約咗個朋友傾傾旅行嘢，邊食邊傾，就番佢選址晌旺角區，同埋老友鍾意食日本嘢，搵咗一輪，就揀咗「深宵食堂」。一來見佢風評幾好，二來曾經幫襯過，雖然已喺2014年銅鑼灣店嘅事，但印象唔錯喺會有啲加分。

跟銅鑼灣店一樣，餐廳位處商廈，一出電梯就喺餐廳環境，以「食堂」為名，總有種小店嘅感覺。整體環境唔算大，但裝修樸實而幾骨子，淺木色和風系，牆上又貼咗唔少日漫海報，更多添日本風情。

雖然未有耐到日本嘅春季，但一室天花掛滿櫻花裝飾，襯以串串日式燈籠，感覺多咗好多春日暖和氣氛。

我哋版被安排坐晌近窗口嘅二人枱，叫做多少少街景睇吓。

食物嘅選擇就以6張點菜紙為主，類別分為前菜、甜點、炸物、燒品、一品料理及主食，而牆上掛有一小塊黑板，寫住好幾款深宵推介。

飲品名單就印晌另一張餐牌上，有啲啤酒、清酒、汽水及特飲。餐廳上菜都幾快手，好在我哋就醒目，唔會一次過落晒單，分段落，尤其食串燒，點可以俾佢攤凍架，當然要襯熱辣食啦，配埋杯凍飲，咁至夠爽。

巨峰提子梳打 $38、烏龍茶 $16

夠晒大杯，兼隻杯嘅圖案都幾得意。友人揀嘅巨峰，味道OK，但略嫌唔夠「汽」咁，感覺未夠爽；小弟就正氣少少，飲烏龍茶，諗住食串燒，清清啲油膩感啫。

櫻花蝦沙律 $58

以沙律菜、車厘茄做底，淋上日式胡麻汁，幾典型嘅西日菜式，沙律菜新鮮爽脆，胡麻汁夠香濃，故味道基本上唔差得去邊，添咗啲櫻花蝦，就多咗份卜卜脆嘅口感。

名古屋雞翼 $42

友人喺日本通，話呢一款以麵豉做醃料嘅炸物值得一試。一客有3隻全翼，炸得金黃，色澤平均，更撒上白芝麻。咬落外皮好香脆，又唔油，不過，似乎又唔喺好覺有麵豉味啫。

厚燒牛舌 $38

我哋唔喺嗰啲一定要食好多肉嘅人，所以，串燒除雞翼，就只有呢串牛舌喺肉，其餘大部分都喺蔬菜類。牛舌燒得唔錯，唔會好乾身，入口煙韌有咬口，簡單鹽、黑椒作調味，已可以好好食。

芝士年糕 $38

唔知點解，對芝士年糕好似有啲情有獨鍾。一客兩粒，並且一開二。暖暖哋嘅年糕口感軟綿綿，卻喺好煙糯，而裡面半溶嘅芝士香濃得嚟唔會太搶，唔錯，唔錯！

芝士蟹肉大啡菇 $48

大啡菇燒過之後，多少有點縮水，所以，比預期無咁大件。雖然面頭灑上好多芝士，但隱約都見到多7肉嘅蹤影，其實，芝士下確喺有唔少蟹肉，加上件大啡菇燒出嚟嘅效果仲保持到水份，一啖入口真喺幾正。

芝士翠玉瓜 $28

正所謂一不離二，二不離三，再嚟多道芝士燒蔬菜嘅菜式。呢個都喺較少嘅配搭，簡單燒香啲翠玉瓜之後，再放上芝士烘溶佢。睇見啲芝士溶溶哋，可以食出拉絲嘅效果，而晌芝士味中，都仲嗒到翠玉瓜嘅清甜味。

牛油燒蕃薯 $28

煨蕃薯呀，燒蕃薯呀，本身都喺好好食嘅菜式，用上日本蕃薯仔，搽上牛油至燒，梗喺正啦。啲蕃薯仔又夠粉，又香甜，個人嚟講，塗多一、兩朕牛油等佢更充滿油香就仲好。

豚肉生姜燒丼 $48

齋食串燒而無飯到肚好似差啲差啲咁，所以，簡單點咗一客豚肉生姜燒丼過吓飯癮而已。賣相就平平無奇架喇，但食味不俗，豚肉好嫩滑，飯粒飽滿分明，又吸收咗啲豚肉汁。

一次過試咗多道串燒，都做得有水準。雖然，坐吓坐吓都爆場，眼見侍應得兩個女生，但招呼到位勤快，又有禮貌，成晚都無咩甩漏，喺食得好「宵」遙自在嘅一晚。

個人評分
味道：8/10
環境：7/10
服務：9/10
抵食：8/10
平均每人消費：HK$200

餐廳資料：
深宵食堂
旺角彌敦道575號Ladder Dundas 3樓
2363 1152