城寨風味 Wall City Flavor：「城」先啟後

知道「九龍城廣場」搞咗個「光影聖誕城」展覽活動，將香港電影同大戲院文化舊貌還原，雖然規模唔大，但幾個場景佈置都做得似模似樣。小弟喺啲老派人，專登嚟睇睇懷緬吓昔日情境。而搵食方面，睇到廣場內嘅「城寨風味」嘅風評不俗，是日晚餐就在此落腳。

餐廳環境幾有新色，古雅盎然，餐牌首頁有介紹牆身用上青磚紅泥牆做法，喺模仿番九龍城寨嘅感覺，配合其歷史背景及清初江南特色。如再周圍睇睇，就會發現更多古典氣息嘅仿舊擺設。

餐牌內頁，除咗有九龍城寨嘅少少歷史及餐廳嘅介紹之外，雖賣嘅喺中菜，但就集多個地方嘅大成，不拘一地。

而翻一轉餐牌，由小食、湯品、燒味、海鮮、各式小炒、煲仔菜、飯麵，以及素菜都有，而絕大部份菜式均圖文並茂。

另有一大張硬板餐牌，喺「食客十大推介」，相信唔會喺食客票選，但寫得出嚟，應該都喺店家嘅撚手菜式。

翻去後面，原來佢哋仲有做私房菜，需一天前預定，但只列出唔同款式嘅菜色，但就無一個價錢作參考，有興趣嘅朋友要自行問問店家。

自家製酸木瓜

先放低嘅喺開胃小吃酸木瓜，酸爽脆口，喺幾開胃。

頑石點頭 $108

單睇個菜名就梗喺唔知搞邊科，不過，菜式名下面有註明喺北菇紅燒豆腐，友人鍾意多素，所以，呢道菜式啱晒。冬菇唔喺好多，都仲要喺薄片，主要喺啲紅燒豆腐，幸而啲豆腐既滑，又有豆香，個芡汁亦頗香濃。

城寨小炒皇 $198

家家中菜館都總有一道小炒皇，然而，基本上都喺大同小異，土魷、蝦乾、豬腩肉爆炒啲韭菜花，而呢度嘅小炒皇就仲加埋鮮蝦，食味就夠鑊氣，不過，意外哋覺得好辣吓，但餐牌就無特別註明喺頗辣嘅菜式，另外，定價$198明顯有少少喺偏高。

桂花炒魚肚 $188

平價版嘅可以揀「金柱鄉下仔炒銀芽」($98) 過吓口癮，而高檔啲就可以選「桂花炒魚肚」，後者貴在加入魚肚，而又要將蛋漿炒碎成「桂花粒」，功夫相對多。友人幾鍾意呢道菜，因為味道較清，啲銀芽好爽口，魚肚又嫩滑。

柑桔蜜脆蝦球 $188

既為十大推介菜式之一，應該唔差得去邊，蝦球先沾粉漿脆炸，故咬落十分香脆，而蝦肉嘅質感保持爽彈，再推個柑桔蜜汁，味道芳香清新，酸甜度又啱啱好，酸爽怡人。

生滾潮式蠔仔粥 $138

與其食啲炒粉飯麵，大家一致建議點呢個蠔仔粥，一來可以慢慢食，食落暖笠笠唔怕咁快凍晒，二來相比啲粉麵飯就較有特色。事實上，個蠔仔粥真喺做得唔錯，啲蠔仔肥大肉厚，又有蠔味，兼份量十足，個粥底頗鮮甜，值得推薦。

紫米露（免費）

啲侍應都幾好招呼，好似我哋食完晒嘢，幫忙收拾好枱面，仲稍微抹乾淨，但又無話催埋單。最後，更免費送上紫米露，雖然唔喺咩特色嘢，但臨尾有碗糖水潤吓，心情都靚好多，而個紫米露，都OK啦！

文初提及過商場內個「光影聖誕城」展覽活動，都想藉幾張相片跟大家分享吓、懷舊吓！

整體嚟講，「城寨風味」師傅做菜嘅手功紮實，幾道菜式都無走樣，確喺唔錯，招呼亦到位，不過，以九龍城廣場呢個地理位置，定價就略嫌偏高，頫帶一提，茗茶每位收$15，另需收加一服務費。

個人評分
味道：8/10
環境：7/10
服務：9/10
抵食：7/10
平均每人消費：HK$240

餐廳資料：
城寨風味 Wall City Flavor
九龍城賈炳達道128號九龍城廣場1樓126號舖
2718 0801