2019年12月10日星期二

芝麻開門甜品專門店 Open Sesame Dessert:「芝」潤味美

老友知小弟喺榴槤粉絲,又喺甜點迷,介紹我呢間新開嘅甜品店「芝麻開門」,再者,位處太子,對我嚟講非常方便。加上呢區近地鐵嘅周邊,食肆多到日日嚟試,食幾個月都未試得晒呀,故此,最好晌附近食完飯,過嚟食份甜點先走。
晌門口已貼咗一大張「餐牌」,一睇就知主打喺賣港式甜品,新派、傳統都有,而走入店內,小店枱局,裝修簡潔明亮,以青綠色為主調,清爽怡人。本以為呢類港式甜品會以年輕人居多,但幫襯嘅反而有唔少中年人仕,聽佢哋只店主嘅對話,更有不少喺附近嘅街坊嚟。
枱上放有大大張餐牌,底面兩大頁就印晒所有甜品款式,都喺慣常見到嘅類別,如芝麻開門精選、夢幻芒果系列、經典回味燉品、黑白涼粉系列、正氣紫米露系列、彩虹仙子系列、滑嘟嘟西米露系列、誘惑D24榴槤系列、拿破崙系列、美味班戟系列、雪糕綿綿冰系列、楊枝甘露系列、百變窩夫系列、養顏椰皇系列、新鮮果汁系列及爽爆奇冰系列,數數埋埋過百款呀!
講明喺甜品店,通常繁忙嘅時間都喺得某一段,為增加吓多啲收入,特設咗下午茶時段,兼營吓啲麵餐、點心小食……等等。
bowl榴槤燉椰皇 $56
因為一心一意嚟試其榴槤甜品,所以,目標範圍就收窄好多,一喺就榴槤系列嘅其中一款,一喺就榴槤燉椰皇,考慮良久,都喺揀後者。雖然佢標示凍食,但其實喺可以揀暖食或熱食,非常貼心,外面天氣咁凍,小弟就自不然揀熱食。
以一個小托盤奉上,較特別嘅喺將燉椰皇、D24榴槤肉及椰奶分開裝,好處喺如果朋友想試啲燉椰皇,但又怕榴槤,咁分開上就可以試得到。
先試一口椰皇內熱辣辣嘅燉蛋白,無過甜,非常嫩滑,一入口就滑落喉嚨。連帶點椰奶,味道就更香。
至於啲D24榴槤果肉,堅掂呀,榴槤味既濃且香,口感軟綿,先配啲燉蛋白試試,果然好正。
食到近尾,當然唔可以錯過啲椰皇肉啦,因為燉到軟透晒,輕易就刮到出嚟,大片大片咁放入口,清甜軟熟,食得夠爽。
好食唔喺得個講字,睇得刮到連丁啲椰皇肉都無剩架!
bowl綠野仙蹤 $50
簡單嚟講,就喺窩夫配綠茶雪糕,不過,店家嘅雪糕口味都有好多選擇,廚房前嘅小黑板就羅列晒出嚟。初時,都有諗過轉其他口味,不過,覺得轉咗其他口味就唔喺綠野仙蹤啦,哈哈!
雖然,個窩夫底只喺原味,無加入綠茶元素,但亦淋上唔少綠茶糖漿,以及好多紅豆餡,仲有一大球綠茶雪糕。賣相無話嘩嘩聲,不過,份量十足,堆得大大碟。
啲窩夫形狀幾得意,喺不規則形,微暖,入口好綿密,唔會一陣風咁。伴上軟滑清幽嘅綠茶雪糕、軟糯起沙清甜不膩嘅紅豆蓉,真喺完美結合,叫人再三回味。
天氣越嚟越凍,加上乾燥得要命,但食過暖入心肺、又咁滋潤嘅甜點,實在喺一份小確幸。不過,有時外面又確喺凍得交關,無問題,我見店家有提供Uber Eats架,門口仲貼有埋foodpanda及deliveroo,咁就算晌屋企,都可以嘆到「暖笠笠」嘅滋潤甜品啦。
雖然小店規模,稱唔上有啲咩服務,但招呼超好,老闆娘好鬼好禮貌,所以,眼見佢又整甜品,又要招呼客人,所以,要額外嘅餐具、紙巾時,都費事煩到佢,自己埋水吧位搞掂。

個人評分
味道:9/10
環境:6/10
服務:8/10
抵食:9/10
平均每人消費:HK$53

餐廳資料:
芝麻開門甜品專門店 Open Sesame Dessert
太子大南街35 號地舖B
2392 2382

沒有留言:

發佈留言