2019年12月17日星期二

御膳 Imperial:一遇再「御」

依家同人講去啲廠廈食私房菜,已經唔喺咩新鮮事,但記得8、9前,由於工廠區嘅廠廈慢慢變得十室九空,而地鋪租金拾級而上,開始有唔少食肆進駐廠廈,與此同時,私房菜嘅概念亦開始普及咗好多,無十年、八年前咁神秘感。事隔4年多,再訪「御膳」,見仍然有咁多客人支持,就知有一定嘅實力啦。
廠廈搵食就最有一種私竇感,門面明明喺工廠格,入到裡面就別有洞天。事隔咁多年,環境格局依舊,但仍保持光猛企理。
除咗散點,仲有好多款套餐,2-9人餐都有,如果懶諗,就索性俾個「筆直」店家等佢幫你度。
bowl香芒沙律大蝦球
先嚟一道中西合壁嘅大蝦球沙律,點解話中西合璧?因為以芒果及多款生果做成清爽沙律底,並以大大片沙律菜墊起,而大蝦球就以中式嘅油泡去處理,再推點鹹蛋黃,最後淋上自家調嘅香芒醬。所以,整體味道好豐富,又好有層次,大蝦爽彈到不得了。
bowl潮州鹵水鵝
依一碟喺例牌份量,下面無墊豆腐之類,份量足,足夠34人食。啖啖鵝肉,無骨無成,肉質細膩軟腍,而且,滷得非常入味,個滷汁深沉醇厚。
bowl金湯海皇翅
因為小弟唔食翅,所以,個海皇翅就由親友品評。佢話個金湯推得好香濃,而內裡混入唔少海鮮料,貨真價實,仲有稀杰度啱啱好。
bowl鮑汁扒花膠
件花膠雖然唔算厚身,但極之大塊,最重要喺炆得夠晒腍,切起嚟黏而有韌勁,入口口感軟滑,感覺喺膠質豐厚,而且,個鮑汁甚為香濃惹味。
講到整大肉蟹,喺呢度嘅主打菜式之一,除咗新鮮揀手大大隻靚蟹之外,整法非常多,有最人氣嘅避風塘炒、需預定嘅豆豉涼瓜焗、惹味刺激嘅胡椒炒、古法蒜子炒、醒胃嘅梅子果皮蒸、薑蔥上湯炒、估佢唔到嘅薑蔥腐乳炒、最食出蟹鮮味嘅花雕蛋白雞油蒸,以及辣粉之選嘅麻辣水煮,真喺花多眼亂。
bowl花彫蛋白雞油蒸大肉蟹
隻蟹大得好有睇頭,睇對鉗就好有肉地。唔使太擔心有好重酒味,入口花彫味唔會太重,只喺隱若有微微酒香,而蟹肉嘅鮮味實在喺度菜嘅亮點,蛋白亦十分滑溜。
bowl蒜蓉粉絲蒸蟶子皇
食完個蟹,再嚟另一招牌海鮮菜式:蟶子皇,叫得蟶子皇,堅喺大隻啦,斤兩十足, 蟶子既彈牙,又鮮甜,面頭蒜蓉鋪得滿滿,唔香至奇怪,但蟶子嘅鮮味絕無冚晒。
bowl薑蔥炆龍躉腩
連續多道海鮮菜式,都喺水準之作,估唔到,依一道炆龍躉腩,唔止賣相精緻,味道意外嘅好,親友仲大讚好食。平常晌啲中菜館食,都喺砂鍋上,出嚟嘅效果比較油,但今次就無咁嘅弊病,魚腩肥美不膩,口感嫩滑,外層更有種焦脆感,而薑蔥嘅香味完全融入魚肉中,烹煮嘅功夫出色。
bowl士多啤梨骨
其實,食到呢度都已經好飽吓,但呢一道招牌「士多啤梨骨」,又點可以錯過吖。以肋排入饌,先炸過,所以一咬會陣陣脆香,肉質卻十分軟腍,而個士多啤梨汁推得甜而不膩,淡淡甜味,又有少少酸香,不負招牌之名。
bowl蟹油銀芽炒麵
單尾雖然只喺炒麵,但用咗蟹油嚟炒,立時感覺唔同晒啦。炒麵看似簡單,但炒得爽身,唔油膩,色澤均勻,卻喺要啲功架。整體炒得乾身,食完唔會碟底泛油,味道芳香。
bowl芒果布丁
最後就喺甜品作結,但別太多期望,只喺芒果布丁而已,但放晌小樽裡,都叫得別緻啦,味道亦都唔錯,口感軟滑,最好喺俾咗好多花奶得任添吖嘛!
綜觀成餐飯,食材新鮮,廚藝紮實,招呼細心,年輕嘅侍應不時幫忙換碟,清理枱面,亦都好有禮。順帶一提,佢哋無開餅費,無切餅費,更喺無加一添,唔怪之得見咁多客人帶埋紅酒嚟暢飲,帶埋蛋糕嚟慶生啦,所以,「御膳」值得一遇再遇。

個人評分
味道:9/10
環境:7/10
服務:8/10
抵食:8/10
平均每人消費:HK$750

餐廳資料:
御膳 Imperial
觀塘敬業街65-67號敬運工業大廈12樓F室
3575 9567 / 9029 1530

沒有留言:

發佈留言