Hokahoka：普通之選

死佬飯局因多重原因，都停咗成年幾、兩年，暫未知幾時會搞番，不過，就有同個別死佬食吓飯、聚一聚。今晚，就多幾個死佬一齊，一行8人，就搞咗個小飯局。時間、選址都喺由佢哋負責，小弟就跟大隊按時出席，而所揀嘅餐廳喺尖東嘅「Hokahoka」居酒屋。

個場好多柱位，又有少少轉嚟轉去嘅感覺，但整體其實地方都幾大，周圍都擺滿充滿和風嘅裝飾。其中一個大房更設置成「榻榻米」形式，更具日本風情。

唔單止門口嘅飾櫃放滿大大細細嘅日本清酒、吟釀，更連牆身、枱墊紙都印上唔同嘅日本酒，可見店主對日本酒幾咁專注。

前菜 $20

咪以為只有酒樓收你前菜費，其實唔少日式居酒屋都一樣收，而且，比酒樓仲搶錢，斷人頭計。不外乎都喺啲甘筍絲、牛蒡絲，味道OK咁啦。

本主餐牌又大又厚，又做成膠底，反反哋光，盡量影啦。翻一轉，就知佢哋賣嘅菜式甚多種類，刺身、壽司、卷物、串燒、炸物、一品料理、燒物、天婦羅、茶漬飯、雜炊、食事……等等一應俱全。

此外，仲有一張類似推介嘅餐牌，製作簡單，有啲手寫嘅感覺。

鮮茄沙律 $55

雖然叫話鮮茄沙律，但裡面放咗好多青瓜，以及面面放咗啲雞肉。拌以黑醋汁，食落好清爽，但啲蕃茄就唔算話好甜、好濃蕃茄味嗰種。

凍豆腐 $50

啲豆腐嘅質感嫩滑得如BB仔嘅肌膚，又好夠豆香，添少少醬油已算得上好食，反而，面面嘅白飯魚脆脆就更好食，喧賓奪主呀喂，哈哈！

炸河蝦仔 $108

送啤酒嘅最佳良伴，河蝦仔入口脆卜卜，又唔油膩，大可作為等人時候嘅餐前小食，不過，索價百多元感覺就絕不便宜。

吉列薯餅 $45

呢度做嘅吉列喺食得出炸功了得，先試試個薯餅，炸得一身金黃，而且，咬落去咔嚓聲響，脆到不得了，卻亳無油膩感，且有濃郁薯香。

吉到蠔 $85

再試埋個吉列蠔，一客有成5隻，入口外脆內軟，清楚睇得到外層好薄，蠔肉肥厚又好有蠔味，呢個性價比高。

炸雞肉 $70

近排聽人講麥記嘅炸雞賣得好貴，而呢道炸雞肉亦不遑多讓，索價70，其實得幾嚿仔，亦無乜點調味，幸而肉質都有一定嘅嫩滑。

串燒拼盤 $90

一客拼盤共有5串，不過，就無列明有啲咩串燒，而眼前呢份就有青椒、牛脷、豬腩、雞軟骨及雞肉棒。燒得都頗香口，又唔會好乾身，輕輕鹽同黑椒調味，已好足夠。

黑豚麵豉炒野菜 $85

見推介嗰度有呢一款一品料理，順利成章點番一客。用麵豉去炒，確惹味十足，加上啲黑豚入口唔肥，啲椰菜好爽，整體真喺唔錯。

壽司拼盤（特）$460

諗住人多就點一份壽司等大家墊吓肚，仲豪啲專登揀個特級嘅壽司盛，睇佢索價要成460，一喺就大大盤有睇頭，一喺就用料豪華，點知兩樣都唔喺，連擺盤丁點裝飾都無，睇見成品，都打咗個突。我只喺試咗款海膽，唔得，入口有陣陣苦味，亳無甘腴感。

鐵火卷 $98、加州卷 $78

由於個壽司盛嘅份量得咁少，故再追加多兩客卷物，穩膽喺加州卷，食少少質素有鐵火卷，即喺吞拿魚卷。前者做得一般般，啲蟹籽黐得「求其」，後者嘅紫菜喺腍嘅，大大影響個口味，最唔理想喺啲飯粒有點點「爛」嘅感覺，而唔喺黏糯得嚟飯粒分明。

日式炒烏冬 $75

死佬即喺死佬，都喺要多啲澱粉質到肚，所以再追加一客炒烏冬同雜炊。呢個烏冬又炒得幾夠「鑊氣」咁喎，啲烏冬唔會炒到又腍又爛，食味真喺唔錯。

鳥雜炊 $70

即喺咩嚟？其實就喺雞粥，不過，就唔喺我哋粵式綿綿嗰啲生滾粥咁，但又未至於稀飯嗰種飯粒分明，味道較清，有啲蛋絲、冬菇、紫菜咁，OK喎。

燒飯糰 $40 x 2

最後嚟個燒飯糰，純粹貪得意過過口癮，搓得實淨，入口外層有陣陣焦脆，裡面好軟糯，更附送麵豉湯。不過，賣到40蚊一個，始終都感覺有點貴。

整體而言，食物嘅質素有高有低，其實，服務都好好，侍應都好落力招呼，不過，食材嘅質素，跟定價及份量不成正比，所以，性價比唔高。

個人評分
味道：7/10
環境：7/10
服務：8/10
抵食：7/10
平均每人消費：HK$260

餐廳資料：
Hokahoka
尖沙咀麼地道63號好時中心51-52號舖
2366 1784