板神鐵板燒日本料理 godofteppanyaki：抵食有「板」法

唔知喺唔喺社會事件問題，近來就見唔少餐廳推出好多優惠，繼幾個月前到過機場嘅「空港居酒屋」大嘆鐵板燒，今晚同表哥嚟到觀塘嘅「板神」，同樣因為有超抵食嘅鐵板燒推出，點抵法，一陣你就知。

觀塘區晌呢十年八年銳變咗好多，不斷有新商廈落成，就算唔喺新商廈，亦有唔少廠廈變身，好似「板神」位處嗰幢就喺其一。「板神」嘅門面非常型格，又帶點神秘感，單睇門面，真喺估唔到呢度喺工廠區。入到裡面，第一眼就喺壽司吧枱，設計好有個性，仲剛剛完咗起一條吞拿魚嘅表演。

如果坐晌出面嘅壽司吧枱，當然喺揀「廚師發辦」啦，一邊睇師傅捏壽司，一邊就可以慢慢細味每一件出品。而「廚師發辦」有兩款選擇：「梵」（＄880）、「神」（＄1,280），已包埋前菜、沙律、丼飯、湯品、甜品……等等。

再略略環顧四周，以廂房為主，周邊加入好多垂直綠化，令成個場睇起嚟唔會太冷，而有種悠然感。

而我哋被安排近門口嘅一個廂房，裡面裝潢簡約，卻又有點粗獷原始味，尤其背後嘅一幅石牆，圍住鐵板燒個「舞台」可以坐到7個人。小弟坐晌邊位，更可以睇到鐵板燒枱內部，足証乾淨衛生。

除環境，餐具亦都好別緻，一碟、一杯，甚至筷子托，都好靚、好襯。而服務都好熨貼，侍應既有禮，又不時為我哋添茶及收拾餐具。

文初已講嚟嘅目的喺佢哋新推超值嘅鐵板燒套餐「席前鐵板燒二人前」，性價比真喺堅高，個套餐包括時令沙律、前菜、刺身五點、銀雪魚、鵝肝、鐵板美國肉眼薄燒、炒時令野菜、炒飯、湯、甜品，仲加送南非鮑魚，只賣$880，更喺二人價添，平常食個有啲質素嘅鐵板燒座底六、七百起錶啦。

時令沙律

迎接美食之前，先喺沙後及前菜同步登場。雖然喺簡簡單單嘅野菜沙律，但蔬菜嘅種類豐富，而且好新鮮，尤其啲露筍，爽脆無渣，淋上胡麻醬，已夠晒好食，開開胃納。

前菜

前菜就喺幾款漬物，包括喺啲醃漬嘅蘿蔔同蒜頭，前者酸香開胃，而後者就最有驚喜，因為一般蒜頭食落都喺軟軟腍腍，除非炸過，但呢粒蒜頭入口喺好爽脆，好似食緊「酸蕎頭」，非常得意。

特色刺身五點

賣相分精緻，而每件刺身都切成剛好一口過，包括有鮮帶子、油甘魚、拖羅、金目鯛及炙燒吞拿魚，每款睇外觀都感覺到佢哋嘅新鮮度，入口果然喺靚料，鮮味爆燈，而且，各有特色。

跟住見到年輕嘅師傅登場，就知輪到喺鐵板燒時間。先捧上一碟加拿大銀雪魚、澳洲鮑魚、鵝肝及野菜，睇住啲鮑魚仲郁吓郁吓，非常新鮮，而鵝肝撲咗少少麵粉，師傅話一陣煎起嚟外層就更香脆。

加拿大銀雪魚、澳洲鮑魚

睇住師傅將鮑魚起肉、去內臟、調校唔同火力慢煎、灑水、切片、再放回外殼，真喺一擔心機；同樣，啲銀雪魚雖然少啲步驟，但要煎得色香味俱全，都有唔少功夫同竅門，實在喺台上一分鐘，台下十年功。

煎好嘅成品，經過細心嘅擺盤，襯以少少野菜，真喺感覺唔同晒，成道精緻嘅主菜咁。

先試試啲鮑魚，入口口感柔韌，唔會有咬唔入嘅感覺，沾沾放晌碟邊嘅岩鹽及黑椒，鮑味更突出。

再試埋啲銀鱈魚先，表皮煎得非常焦脆 ， 而啲肉質細緻嫩滑，又極富油香，果然極具質素，平常晌出面食一客銀雪魚都成嚿水架。

香煎鵝肝

與此同時，已見師傅煎緊鵝肝，相對嚟講，煎鵝肝就無咗多技巧，最緊要喺有耐性，慢慢煎到兩面「起焦」。基本鵝肝都幾油膩吓，所以師傅特登配件多士嚟食。

件鵝肝果然煎得外脆內軟，外層好似啲法式焦糖燉蛋咁有層脆殼，裡面就嫩滑到不得了，並且充滿甘腴油香，細細哋一口，過到口癮，又唔會太罪惡感。

鐵板美國肉眼薄燒

再落嚟，師傅捧上一盤薄切肉眼，雖然唔喺日本啲雪花和牛，但睇色澤、油花，都已經好靚。肉眼已經簡單以鹽及黑椒調味，再準備好自家製嘅獨子蒜蒜片及大量蔥花。

師傅三兩吓手勢，將薄荷薄嘅肉眼燒一燒，再加入蒜片及蔥花，捲起後，再軋成兩截，方便一口一件，就上碟食得。

每位客人可享有兩大片肉眼，即喺有4件。薄切嘅肉眼口感柔嫩，有肉香，有點點油脂。由於捲住大量蔥花，所以，完全無油膩應，加上蒜片引發嘅香味，每肉眼薄燒味道更具層次。好奇問師傅，墊底嘅塊麵包有無人會食埋，佢笑笑口話都有架。

牛肉炒飯

雖然餐牌只喺寫住牛肉炒飯，但師傅靜雞雞講喺用上和牛嚟做。佢先炒香啲配料及牛肉，再加飯及蛋漿，不斷兜，不斷炒。

飯粒炒至金黃色，粒粒分明，加上配料多，食落飯粒又爽身，入口「暖笠笠」，食埋碗飯就夠晒飽肚。

味噌湯

我哋香港人就喜歡一餐之前就飲湯先，但日本人就相反，食到尾先嚟一碗熱乎乎嘅麵豉湯。麵豉味香濃，但又唔會太濁，內裡更混咗唔少海帶。

甜品

餐餐所包嘅甜品可以揀芝麻雪糕、綠茶雪糕、朱古力雪糕或香桃雪葩。表哥就揀芝麻雪糕，小弟就想食雪葩多啲，雖然我嘅雪葩個樣衰啲，但感覺清爽，桃味不俗。

蜜糖多士

以為食埋個雪糕就完，師傅仲額外整多份蜜糖多士俾我哋嘆，大量牛油將方包煎香，入口熱辣辣，又焦香甘脆。

晌一啲傳統市中心旺區，食一頓有番咁上下質素嘅鐵板燒，真喺無$1000，都要上$600、$700一位，但依家未夠$900，就已經喺二人價，加埋一都唔過$500一個人，加上菜式唔少，食材不賴，性價比確喺高。

個人評分
味道：9/10
環境：8/10
服務：9/10
抵食：9/10
平均每人消費：HK$485

餐廳資料：
板神鐵板燒日本料理 godofteppanyaki
觀塘駿業街43號地下
2816 0617