The ThirtySix：酒吧中的日系午餐

為咗慳啲錢，有時都會走到上中環扶手電梯荷李活道拍拍卡，慳$2。某日經過「大館」對街，見有家樓上酒吧餐酒派單張，新推一系列午餐，估唔到酒吧餐廳賣日菜，好奇之下走去試一試，順便同舊同學聚聚，談談近況。

餐廳位處2樓，一面玻璃窗可以睇到對面「大館」。

因為餐廳主要喺行酒吧路線，所以，一入門口就見到大大片吧枱區域，背後放滿各式各樣嘅烈酒、餐酒……等等。

再入少少，就喺用餐區，以黑色為主調，裝修型格。內裡有唔少梳化位，坐低輕輕鬆鬆，啱晒三五知己嚟飲幾杯。

「招牌午餐」一共有5款選擇，都喺和風菜式，定價$88-$148，包一杯指定飲品。其實，跟同區類似嘅午餐比，定價確喺有點點偏高。

青檸梳打、玄米茶

落單你耐，先嚟兩杯餐飲，小弟所揀嘅青檸梳打，入口青檸味鮮活，酸香而清爽，冰冰涼涼，真喺揀啱用嚟襯一陣間嘅迷魂飯。

清酒鹽烤日本鯖魚味飯 $118

友人頗鍾意食魚，所以，就選上鯖魚味飯。雖然明顯喺一道日菜，但擺盤好西式，賣相精緻，兩大件烤鯖魚，份量十足，仲配上好多醃菜。

先講件鯖魚，雖則話清酒鹽烤，不過就唔太覺有酒味，但就有份鹹香味，肉質挺實卻唔嚡，仲帶幾分油潤；而友人最欣賞啲飯口感軟糯，更搓成一個個球形，以及灑上唔少飯素添味。

慢慢煮厚切日式黑松露叉燒鵝肝迷魂飯，配自家製越式醃菜 $148

小弟就揀咗碟頗邪惡嘅高級日版嘅「黯然銷魂飯」，點解叫高級？加咗大大件鵝肝囉，而叉燒則用上日式叉燒，配日本雞蛋。整碟飯賣相同樣好靚仔，伴以大量酸香醃菜。

鵝肝好油潤，煎得非常之香，同友人「些牙」一半，罪惡感減半；但其實啲叉燒仲邪惡，因為邊位嘅油脂更狠，加咗啲黑松露醬，好食得嚟竟然意外地有另一種浪漫「梅肉扣肉」嘅感覺，雖然隻日本蛋煎成太陽蛋，但一樣有「流心」嘅效果；大量嘅醃菜正正中和一下由鵝肝及叉燒帶嚟嘅油膩。

可能都喺新加設午飯時段，所以，到訪當日嘅客人唔多，加上透入燦爛嘅陽光，感覺寧舍舒服，而且，招呼亦唔錯，店員非常有禮。佢哋更話，午餐可做外帶，2:00pm後外帶嘅話更有85折。

個人評分

味道：8/10
環境：8/10
服務：8/10
抵食：7/10
平均每人消費：HK$150

餐廳資料：
The ThirtySix
中環蘇豪荷李活道23號金珀苑2樓
2336 1411