餐廳嘅鋪面專登設計成半露天嘅酒吧區，適合兩三知己晌度暢飲。而入到裡面用餐區，地方頗為闊落，樓底又夠高，裝修亦睇得出花過心思，好似一邊裝置啲假窗，另一邊又畫咗啲牆畫。大屏幕不斷播放MV，再配以柔和燈光，頗有情調，順帶一提，一到9:00pm，極整間餐廳嘅燈光會再調調啲，心情會更放鬆。
餐牌都幾得意，設計成好似份報紙咁，翻開一頁又一頁，印刷精美，部份菜式更有圖片作參考。基本上，由湯品、前菜、漢堡、意大利飯、意大利麵、主菜、扒類、甜品……等等，都一應俱全。
至於飲品，就印於另一個細餐牌度，由於我哋都唔喺識飲之人，但又想試吓啲特色啲嘅嘢，所以，朝非酒精嘅雞尾酒欄目注目，最好就喺每款特飲都清楚列明有咩成份。
Dr. Kitty $78
以荔枝、芒果糖漿，混入菠蘿汁及乳酪溝成，最別出心裁喺用上實驗室嘅量杯做器皿，杯邊放上荔枝果肉作點綴，好吸晴嘅外觀。表哥就話出奇地好飲喎，清香，又無過甜，幾隻果香拼埋一齊又幾夾啫。
Teaco $78
小弟就想試試呢杯以烏龍茶做底，再加入乳酪、蘋果汁、蜜糖，面頭仲打咗一層忌廉芝士竹炭奶泡，非常玩味，賣相亦好得意。先試啲奶泡，略帶點鹹香味，而再飲落去，有種台式果茶嘅韻味，口感細膩。
澳洲和牛肉醬手工貝殼粉 $168
睇見意大利飯、意大利麵都幾主打咁，款式亦多，所以，就試吓呢一道以澳洲和牛入饌嘅高級肉醬意粉。意粉面灑滿巴馬臣芝士，又放咗幾粒水牛芝士，睇嚟賣相平實，但芝士之下仲有隻63°C煮成嘅溫泉蛋，意粉都喺自家手工製嘅貝殼粉，可謂處處心思架 。
將所有材料撈勻，一啖入口，牛肉嘅肉香，溫泉蛋嘅蛋香，芝士嘅奶香，混和一起真喺好搭配，香濃惹味，而且，啲長條形貝殼粉做得咬口。
烤德國鹹豬手 $238
好一段日子無食過鹹豬手喇，而且，表哥都話，其他扒類食到嘅機會都大，鹹豬手都唔喺間間都有做，故此，一於點呢道菜。店員好貼心，先捧上枱俾我哋影影相，之後再拎番入去切件，並伴以酸菜及炸薯角，再度登場。
童叟無欺，隻豬手確喺好大隻，可謂份量十足，而且，更喺做得有水準。外皮勁脆口，咬落咔咔聲，而豬手肉鹹香好食，味道啱啱好，一口豬手肉，一口酸菜，咁就夾晒，就連啲薯角都香而不膩。
焗酥皮香蕉卷配自家製開心果雪糕 $68
睇見佢哋嘅甜品選項都唔弱，勾起心癢癢一試嘅念頭，而最心水喺呢一款焗酥皮香蕉卷。此時過咗9:00pm，所以，整間餐廳嘅燈光都調暗，幸而每枱都放盞小枱燈，否則就好難影到張似樣啲嘅相。
香蕉卷做得非常大件，真材實料，送到上枱時仲聞到陣陣香氣。入口外層嘅酥皮超香脆，陣陣牛油香，香蕉餡肉又軟綿清甜，搭小小開心果雪糕，享受嗰種冰火感覺，更能討人歡心。
都話依家啲酒吧餐廳所做嘅菜一啲都唔失禮，有啲更喺喜出望外，好似今晚所試嘅3道菜，都喺具水準嘅出品。加上環境好，有氣氛，招呼亦熨貼細心，確喺搞聚會嘅好地方，總算揀啱咗個「Right Place」！
個人評分
味道：8/10
環境：8/10
服務：8/10
抵食：8/10
平均每人消費：HK$315
味道：8/10
環境：8/10
服務：8/10
抵食：8/10
平均每人消費：HK$315
餐廳資料：
191120 The Right Place
尖沙咀寶勒巷17-19號地下
2311 7212
191120 The Right Place
尖沙咀寶勒巷17-19號地下
2311 7212
沒有留言:
發佈留言