2019年11月8日星期五

The Lounge:相聚一「黑」

「千禧新世界香港酒店」中嘅「嵯峨野」及「桃里」均曾到訪過用膳,兩次嘅體驗都喺高水準,有驚喜,而「The Lounge」則是第一次到訪,目的都喺為着其新推嘅「情迷朱古力」下午茶套餐,又喺朱古力,又喺甜點,啱晒我啦。
踏入「大堂酒廊」第一個嘅感覺喺舒服,一來樓底特高,二來枱椅嘅編排好闊落,故此,空間感超強;如果有留意嘅話,就見門口位喺兩大座書櫃,襯以簡約嘅設計,卻甚具格調。
再者,一整面全部都喺落地大玻璃,採光十足,透進暖和嘅陽光,更感溫暖舒泰。三五知己聚一聚,嘆吓下午茶,確喺非常理想之地。
就連天花嘅燈飾,既合襯,又雅致。
枱上早已擺放好餐具、餐巾及餐墊,但夠膽用上純白色,絕對喺對自家衛生極有信心嘅表現。
晌門口正走進餐廳之時,見到有關個下午茶套餐嘅介紹水牌, 單喺睇相都非常吸引喔!仲講到明,採用精選殿堂級法國品牌Valrhona朱古力嚟製作出多款甜點,呢一點已經好誘人啦。每日2:30pm-5:30pm供應,平日每位HK$238,兩位用就HK$438元,而星期六、日及公眾假期每位HK$298,兩位用HK$538,但據介紹,周末雖然貴啲,但每人會多3款特色鹹點:波士頓龍蝦酥盒、炸蝦漢堡及阿拉斯加蟹肉牛油果香芒卷,咁豐富,當正餐都不為過啦。
而當睇見實物,靚到咁,仲唔嘩嘩聲咩。橢圓形嘅3層架,每樣都做得精緻的骰,尤其是啲甜點,亮麗吸引,未食先興奮。
咁究竟有啲咩食?翻開主餐牌就有詳細介紹,一共有5款鹹點、6款以朱古力為主題嘅甜點,套餐並包括咖啡、熱茶或香草茶,此外,若你喺朱古力狂迷,更可額外加多$30將套餐飲品升級為朱古力特飲,不過,小弟都喺喜歡以咖啡襯甜點多啲。
bowl焗鮑魚雞肉酥
雖然,無話咩特定食法,但小弟都喺喜歡先鹹後甜,而鹹點中則揀焗鮑魚雞肉酥先,喺因為侍應溫提,鮑魚酥喺焗起無耐,趁熱食。雖然只喺細細件鮑魚,但一樣柔韌有鮑味,牛油皮嘅撻殼好鬆化。
bowl意大利巴馬火腿伴蜜瓜
再試試嘅喺巴馬火腿,睇落已感覺到好油潤,而且,色澤光亮唔會好暗啞,入口果然鹹香,尤其配上鮮甜嘅蜜瓜,更亳無油膩感,完全反映出食材嘅質素。
bowl每日精選三文治
鹹點中包含一款精選三文治,雖則叫精選,但又唔好期望過多。是日就喺蕃茄青瓜配高纖麥包,所以,青爽感十足,驚喜就當然唔會有啦。
bowl蟹肉沙律三文魚籽撻
簡單嘅三文治過後,再食呢一件撻仔,感覺就會好唔一樣喇!首先,其賣相的骰而繽紛,蟹肉沙律無欺場,仲加少少芒果粒曾加味道嘅層次,三文魚籽大大粒,卜卜脆,撻殼好脆口。
bowl鵝肝醬伴紅菜頭牛油多士
而呢一件就喺另一種奢華,因為,只喺下午茶就食到以鵝肝醬入饌嘅鹹點。圓碌碌嘅外形,由底而上,有一片薄薄嘅牛油多士,厚身嘅鵝肝醬,面層喺一大片紅菜頭,再加一小瓣柑肉作點綴,入口味道紛陳,鵝肝嘅濃香綿滑,配上紅菜頭嘅爽,好夾。
bowl朱古力紅莓鬆餅
完晒一輪鹹點,其實都已經好精彩,跟住落嚟到是日亮點嘅甜品。鬆餅喺呢一類下午茶嘅經典,本身亦食過唔少,但混入濃郁嘅朱古力,加埋啲紅莓乾,無論塗上自家製嘅草莓果醬,抑或忌廉,都好好食。
bowl榛子朱古力球
雖然話啲甜品款款都好吸引,但就以呢一道球型、外層淋上亮麗光澤鏡面朱古力嘅「榛子朱古力球」最討人心。如果細心睇睇,內裡喺朱古力慕絲包住榛子果蓉,入口慕絲細膩幼滑,榛子果蓉柔軟而味道非常突出,仲有點食「金莎」嘅感覺。
bowl柚子朱古力閃電芭芙
試咗兩道朱古力甜點,再以此帶有柚子元素嘅甜點作間場就最流暢。切開一睇,咦!點解白色嘅?原來喺用上白朱古力,混入柚子汁,個柚子味勁搶,酸香味中和晒白朱古力慣嘅甜,而芭芙好鬆化,估唔到咁樣配搭嘅效果咁好。
bowl64%朱古力撻
跟住幾款標明可可濃度,當然由輕食到濃啦。水滴形嘅朱古力撻,外表較平實,但絕對超有內涵。64%純黑朱古力所做嘅朱古力軟漿,濃郁而帶甘苦味,柔滑可口,配合鬆脆嘅牛油撻殼,食罷予人有喜樂感。
bowl66%朱古力法式燉蛋蛋糕
呢一款甜品頗有經典法式甜點「歌劇院蛋糕」嘅影子,由上而下一共有6層之多,包括66%黑朱古力所做嘅慕絲、朱古力蛋糕及法式燉蛋蛋糕,既有不同口感嘅變化,又有唔同層次嘅味道,喺有種好豐富、好多元嘅滋味。
bowl80%朱古力芝士餅
而最香濃嘅朱古力芝士蛋糕留到最後細嚐,芝士本身喺味濃之物,配80%純黑朱古力就可以平衡到嘞。中層加入咗朱古力脆脆,多添一份脆口感;面頭以為喺一抹忌廉,原來喺棉花糖,感覺非常得意。
bowl鮮奶咖啡
雖然拉花嘅線紋未算好細緻,但個心形都算拉得對稱,而且,沖泡得醇香可口,口感均勻幼滑。一口甜點,一口咖啡,襯以優雅明亮嘅環境,同朋友談天說地,講講軼事,說說旅行大計,何其樂乎!
如果你都想好似小弟咁嘆,試到多款朱古力甜點,晌度渡過一段愜意時光,就記得晌12月31日前嚟幫襯。據介紹,11及12月部份星期日,更會與K11 Kulture Academy合作,推出「情迷朱古力下午茶 x 藝術畫作工作坊」,嘆完茶,就地取材,暫時充當一吓藝術畫家,發揮無窮想像力及創意,以唔同濃度嘅咖啡或茶包作畫,聽起嚟都非常有趣。

個人評分
味道:9/10
環境:9/10
服務:9/10
抵食:9/10
平均每人消費:HK$240

餐廳資料:
The Lounge
尖沙咀麼地道72號千禧新世界香港酒店M樓
2313 4222

沒有留言:

發佈留言