2019年11月30日星期六

一粥麵 Super Super Congee & Noodle:我的星期六美孚早餐 ~ 「粥」錯用神

晌美孚區想食粥嘅話,大多數都喺落「海皇」,質素穩定,又經濟實惠,唯一唔好就喺冷氣勁大,近乎坐邊個位都喺咁。其次,就喺落「怡園」,感覺唔錯,只喺相對我哋嚟講遠少少。最近,老婆報料話以前晌「曼克頓山」嘅「又一間」執咗,依家變成「一粥麵」,故此,今個星期六專誠行過去食餐早餐。
對街一邊嘅算喺正門,而商場嗰邊有另一個入口,而水牌、收銀櫃位都晌呢一邊。
新裝修,加上整體格局,比起以前嘅「又一間」真喺好唔同,既闊落,又光猛整潔,更無話排到啲枱櫈密麻麻,以快餐店嚟計,佢哋真喺頗為闊落,感覺非常之好。
如大多數快餐店咁,所有食物都晌晒出面水牌,一目了然。雖話佢哋主打賣粥賣麵,但早餐類別中亦有唔少喺西式嘢,照顧到唔同客人嘅需要。
人龍長嘅話,無問題,隔離就有兩部自助點餐機,相信大家都唔陌生,因為家下有唔少快餐店都裝咗。
落好單,留意住「冧把」等攞嘢。而醬汁、糖鹽及額外餐具,都可以晌出面自由取用。
bowl香蔥櫻花蝦腸粉配啡茶 $24
碟腸粉賣相又幾靚仔喎,睇得到落咗唔少櫻花蝦,非常足料,所以,食落極有口感,而腸粉嘅質感就唔算拉得好滑,算喺不過不失。但杯奶茶就完全唔得,茶底唔香,無乜茶味,又唔滑。
bowl香茜魚粒粥配懷舊糯米雞 $32
晌水牌已寫明個粥喺細碗裝,所以,都預期唔喺平常咁大碗,不過,碗隻糯米雞就好夠飽肚。個粥底都夠綿香,內裡亦有唔少魚粒,但一食就知喺雪藏貨,爽口而無乜魚味,香茜亦只喺隨意灑幾片,所以,食落個粥唔會有好重嘅芫茜味。
糯米雞又如何呢?份量十足架,劏開一睇,亦好足料,不過,就碎濕濕少少,唔似酒樓嗰啲又有雞件,又有叉燒……之類,似喺大版嘅珍珠雞。味道則調校得唔錯,唯糯米有啲削身,幸而未至於好爛嘅口感。
諗住嚟度舒舒服服食碗靚粥,好就好坐喇,不過,食物嘅水準一一般般咁啦,未至於差,但唔叫得好,期望嚟食好嘢就有啲捉錯用神嘞,哈哈!

個人評分
味道:6/10
環境:7/10
服務:7/10
抵食:7/10
平均每人消費:HK$28

餐廳資料:
一粥麵 Super Super Congee & Noodle
美孚寶輪街1號曼坊地下G08號舖

沒有留言:

發佈留言