車輪餅小姐 Ms. Wheel Pie：天「輪」之樂

作為美孚街坊咁多年，唔喺講笑，小弟真喺未幫襯過「車輪餅小姐」，事緣開檔初期，因各大媒體猛咁推，佢哋鋪面又細，好幾次經過都見到長長人龍，我就最怕排隊，整整吓就無咗幫襯嘅念頭。近日行完山返嚟，正想買啲蛋撻返屋企當下午，「多多」排長龍，過嚟「櫻島」啦，已經變咗「聖安娜」，見到「車輪餅小姐」無乜人，就改買車輪餅當下午茶。

相信唔使小弟多介紹「車輪餅小姐」喇，知佢哋小小一間鋪，一家人努力經營。高峰時，曾經要等上十多廿分鐘先食得到，個個都喺新鮮出爐，雖然依家見佢哋都喺密密手製作，但一向貪新鮮嘅香港人嘅熱情好快冷卻，所以，就唔需要點等，大部分款式都製作好有存貨，即買即有，只喺部份熱門款式需要等吓。可惜喺變相食唔到新鮮出爐嘅貨色，風味會打點折扣。

是日嚟到嘅車輪餅口味就寫晒晌一旁嘅黑板之上，有多達8款，都喺$12-$18一個。其實，單賣車輪餅相信都難以維生，所以，晌鋪前嘅水牌，仲見到佢哋賣埋一啲中式糖水，晌凍櫃內就放咗啲西式甜點。

老婆鍾意紅豆，所以，就買咗款自家熬煮紅豆口味俾佢，而難得見到有榴槤口味，當然要試一試啦。買得4-5個，就有膠盒包裝，買得兩個，地道啲，紙袋包裝，然而，個紙袋都印咗「車輪餅小姐」個嘜頭架。

自家熬煮紅豆車輪餅 $12

始終唔喺新鮮出爐，又唔喺即食，車身嘅軟熟度喺差少少，但仍不失蛋香。裡面填滿厚厚嘅紅豆餡，炒得軟糯清甜，又起晒沙，貨真價實，喺唔錯。

馬來西亞D24榴槤車輪餅 $18

近年，馬來西亞啲榴槤好受歡迎，亦有唔少甜品就以此入饌。一切開，啲榴槤味已經湧出嚟，入口柔滑香甜，榴槤嗰種獨有嘅幽香味十分濃郁，無欺場。

雖然，香港人嗰份貪新鮮嘅熱情冷卻咗啲，但當日所見，都仍有唔少人幫襯，正所謂有麝自然香，最緊要保持好品質，唔怕無翻頭客嘅。再者，感受到小店默默耕耘，更加要支持吓啦！

個人評分
味道：8/10
環境：6/10
服務：7/10
抵食：8/10
平均每人消費：HK$15

餐廳資料：
車輪餅小姐 Ms. Wheel Pie
美孚美孚新邨吉利徑19號50B7號舖
6687 1093