2019年11月27日星期三

咖哩爸爸 Curry Pa Pa:冬日「咖」到

近日,卒之明確有啲涼意,清早又低過廿度,有少少入冬嘅感覺。雖然,依家食火鍋都無分季節,但天寒地凍「打鞭爐」較有感覺,所以,是夜同親友嚟到「咖哩爸爸」涮番餐。貪佢定價OK,又有啲優惠,兼且呢一類火鍋放題比較有預算。
咪睇佢門口細細,入到去原來地方幾大,裝修幾骨子,又乾淨企理。眼見卡位比較闊落,比四人枱仲好坐,所以,揀咗卡位。
一大張餐牌顯示晒晚市嘅多種套餐,視乎所揀嘅肉類級數及配搭,定價由$198-$488,由於新張期內,仲有85折優惠添。唯一注意喺同枱所有人要點同一價位套餐。時限為90分鐘,但今晚唔算爆場,夠鐘時店員都無催我哋走。
4款套餐中,我哋揀咗隻平平哋嘅$228套餐,包咗特級雪花肥牛、美國黑毛豬、嚴選肥羊、農場雞肉。餐內全部肉類可無限制添加任食,其他配料、飲品自助放題,任食任飲,當然大前提喺唔好嘥嘢啦。
論到涮涮鍋,先介紹吓有咩湯底,分別有款:養顏花膠雞鍋、特濃爸爸咖喱鍋、爸爸咖喱鍋、重慶麻辣鍋、尚膳清湯鍋、韓國泡菜鍋、蟲草花素菜鍋、爆蒜番茄鍋及藥膳養生豬骨鍋,要留意,部份需額外加錢,亦可加錢雙拼湯底。
當一入門口,就會見有自助食物區,等小弟帶大家睇睇自助食物有啲咩選擇先。數數埋埋,超過50款嘢食,食多,夾幾多。比起百幾蚊酒樓嘅任食火鍋,剔邊樣無嗰樣,平價嘢又專登堆多啲,自助嘅都喺感覺自在好多。另邊廂近雪櫃嗰邊,仲有少少蒸點。
食涮涮鍋點少得「混醬」,醬料區唔算好大陣容,算喺基本嘅都齊。小弟就唔喜歡太雜,醬油、蔥粒、金銀蒜,再糝少少芝麻就夠喇。
除醬料,襯火鍋又豈可無汽水、啤酒之類吖。一組大雪櫃堆得滿滿各式飲品。隔離竟然仲有部咖啡機,不過,呢度甜品得紅豆沙,無其他像樣嘅甜點,所以,因為無甜點好襯,最終都無試到佢哋啲咖啡。
bowl飲品
選擇非常多,坊間好少見到既飲品亦有。有一款韓國出品嘅蜂蜜梨汁(藍罐)配火鍋就啱晒,因為夠潤,而且,飲到底原來仲有好多香梨微粒,所以,再飲嘅話就要搖吓佢。
另一款又喺值得推薦,應該又喺韓國出品,睇圖未必清楚喺乜,其實喺四季桔果汁,酸爽清香,又喺食肉嘅好搭配。
bowl冷盤小食
只喺得兩款,一款喺泰式酸辣鳳爪,另一款喺涼拌筍絲,晌等待個鍋底時過過口癮,味道OK啦。
bowl藥膳養生豬骨鍋
鍋底好快送上,打開蓋睇睇,堅喺真材實料,件豬骨大過我嘅拳頭呀!題外話,佢哋嘅爐好夠火力,輕易就滾起個湯底。先呷幾口試試,掂!鮮甜得嚟帶藥材香,但藥材味唔會太搶,卻又濃而不膩。
其後,店員不時會主動問客人使唔使加湯,而加嘅真喺配合番個鍋嘅湯,而唔喺加啲水落去。
雖然話喺放題形式,但如果你揀咗個平價啲嘅餐,但又想試吓啲高級數嘅肉,餐廳都提供散點嘅選擇,又或你想試啲額外嘅食物,都可透過餐廳提供獨立嘅二維碼,自行以手機落單。
bowl特級雪花肥牛
雖話「特級雪花」,但比小弟預期嘅油脂多,但輕輕灼過,入口又唔喺咁肥咋喎,而且,肉質嘅口感好柔滑。
bowl美國黑毛豬
成日話肥豬肉,反而啲黑毛豬唔喺好多脂肪喎,仲切得薄到透光,雖然喺豬肉,因超薄而無需要灼太耐,啲黑毛豬又喺好嫩滑。
bowl嚴選肥羊
啲羊一啲都唔肥,而且好嫩口,加上羊羶唔太重,相信一般人都接受到,如果少少羶都唔OK,夾住少少蔥粒食,效果好唔錯。
bowl農場雞肉
相對牛肉、豬肉,雞件有番咁上下厚身,灼耐少少安心啲,而雞肉肉質意外咁嫩滑,一啲都唔嚡口,皮下脂肪亦非常少,果然喺農場新鮮貨。
bowl煎午餐肉
另外,額外送贈每客一件午餐肉,當然唔會就咁食啦,都試吓放入湯式滾一滾。但想唔明點解午餐肉唔喺咩貴價嘢,竟然喺自費項目。
bowl火鍋配料
之後幾輪,就分別試試唔同嘅配料,食吓食吓都唔好講笑,雖然無可能試勻晒,但睇我哋都真喺試咗唔少款式,例如多款丸類、僅有嘅少少海鮮、野菜、瓜果……等等,總之,食到捧住個肚走。
估唔到,親友勁擦得,仲食得落成個公仔麵及少少拉麵,小弟就幫襯吓要啲公仔麵,加埋啲濃湯及蒸蝦,作為今餐嘅結尾。
其實,個半鐘食一餐涮涮鍋時間確喺有啲緊,幸而今日人少,可以安心慢慢嘆。因為始終唔喺點最貴嘅套餐,所以,難以評論所有肉類嘅質素,但我哋覺得二百零蚊,我哋揀嘅套餐嘅肉都OK,加上任飲任食,唔使洗,又唔使切,都划算啦。

個人評分
味道:7/10
環境:8/10
服務:8/10
抵食:7/10
平均每人消費:HK$220

餐廳資料:
咖哩爸爸 Curry Pa Pa
銅鑼灣糖街2-8號樂聲大廈1樓101號舖
3596 3682

沒有留言:

發佈留言