2019年11月15日星期五

嘉年華吧 Carnival Bar:「嘉」有喜事

近來局勢依然紛亂,但生活總要過,正如人生總有高低,你嘅生活唔會因此停落嚟,亦要搵啲點子調劑一下,免得太入局而影響自己情緒。故此,是夜與友人專登嚟到沙田「麗豪酒店」嘅「嘉年華吧」聚聚,搵個靜靜哋嘅地方食吓嘢,傾吓偈,談談近況,講講將來,兼且提早試試佢哋準備晌聖誕及元旦推出嘅「節日晚餐」。
聽個名就知喺行酒吧路線啦,原來又唔算喺,反而喺間美式餐廳+酒吧嘅混合體。如果淨喺嚟飲吓嘢,揀啲梳化位就最舒服;如果嚟用餐嘅,有唔少舒適嘅卡位。
入到嚟地方唔止大,仲有好多配套,例如美式桌球枱、飛標機,竟然仲有專業電競設施添,聽店員講都喺新添置無耐,依啲設施仲喺無額外收費。
餐廳正中央仲架起100吋大電視,直播英超同西甲,呢樣就真喺啱晒我。有機會真喺想約啲波友一齊睇住英超,邊睇邊食。
而有關於個「節日晚膳套餐」,定價為$428 / 人,四位用就會平少少,如提前預訂並付全費,更可有低至75折嘅優惠。睇番個餐,都好豐富架,送紅白餐酒或鮮果汁,菜式包括海鮮拼盤、餐湯、主菜、甜品及餐飲。
bowl白酒
由於套餐頭盤喺海鮮拼盤,所以,揀咗白酒嚟襯,而白酒喺自家品牌,店長專登展示一下俾我哋睇。色澤金黃晶瑩,入口帶微甜,有份果香,非常之易入口,配海鮮真喺十分之夾。
bowl國際海鮮拼盤
唔喺講笑,雖然按人頭數,但真喺擺出一大盤共有6款海鮮嘅拼盤(餐牌都喺標示5款,實行賣大包),包括波士頓龍蝦、鮮蝦、青口、鱈場蟹腳、海螺、大蜆,並伴上檸檬角及慣常見到食海鮮用嘅咯嗲汁,單喺份量計,已經覺得好有震撼力,再睇睇睇啲海鮮嘅色澤,絕無欺場。
夾起一碟(打卡用),好有晌自助餐時食凍海鮮嘅感覺,不過,由於喺擺好盤即時送出,心理上更覺「新鮮」。拆咗啲龍蝦啖啖肉,又爽又甜,仲勁多蝦膏,而鮮蝦都唔弱,彈牙味鮮,鱈場蟹亦好正,拉出大大條蟹捧,有蟹味之餘又帶海水嘅鹹鮮,此外, 青口、海螺、大蜆都OK喎,唔會淡而無味,或者韌到擦紙膠咁。
bowl美式鮮蜆周打湯
個湯睇落平平無奇,其實,入口就知真材實料,質感啱啱好,非常綿滑富奶香,而且,混入唔少鮮甜嘅大蜆,但出奇地比凍海鮮啲蜆更鮮,更肥美。
bowl香烤安格斯肉眼牛扒配野菌汁、節日香烤火雞
餐牌中寫住有應節嘅香烤火雞,初時都擔會一大件,依家睇到喺每份主菜都額外配兩大片,共伴有大量薯菜,咁就啱啱好喇。然而,肉眼嘅份量亦唔少,大大件煎得焦香。
啲肉眼火喉煎得恰到好處,入口帶點油香,肉質軟腍,且甚具肉香,食得出喺件具質素嘅安格斯肉眼。沾一沾香濃嘅野菌汁,味道更搭配;
火雞一向俾人嘅印度都喺嚡烚烚,雖然,眼前呢件唔可以講喺嫩滑無比,但亦無話食落好嚡嘅感覺;
至於啲薯菜,唔止喺款多,全部都炒過或處理過,香口而唔會味道好寡。
bowl香燒龍蝦配荷蘭汁 、節日香烤火雞
荷蘭汁通常見於配賓尼迪蛋,但今回就配龍蝦,感覺都好特別。雖然得半隻波士頓龍蝦,但因為本身都夠大隻,所以,整碟出嚟嘅賣相都好有睇頭,尤其香燒過後,龍蝦顯得金黃而焦香,十分誘人。
同樣伴有火雞肉及大旺3薯菜,上文分享過就不多言,集中分享啲龍蝦及醬汁。蝦肉燒得剛好,輕易拆出嚟,沾上少少荷蘭汁,微微酸香嘅醬汁,更吊出蝦肉嘅鮮爽,妙絕。
bowl慢煮三文魚配香草忌廉汁、節日香烤火雞
就算只喺三文魚,都無做得馬馬虎虎,以慢煮方式先處理,再煎香整件三文魚扒,睇層外皮,煎得甘脆吸引。如果有留心,每道菜都有其細節位,將香草忌廉汁以小兜裝起,就唔會因淋落啲魚度而整腍層外皮啦。
由於經過慢煮,所以,基本上上碟前再輕煎就可以,不過,個人就覺得有可能煎過咗少少,所以,肉質確喺柔滑有油香嘅,但又未至於嗰種嫩到滑落喉嚨,然而,配上啲香草忌廉汁,加上啲魚皮勁香脆,整體嚟講都喺一道出色嘅三文魚菜式。
bowl朱古力慕絲蛋糕伴野莓
酒店級數即喺酒店級數,去到甜點都仲喺保持番個水準,店員更話,去到臨近聖誕,裝飾更唔止得啲野莓咁簡單。咪睇件餅「黑掹掹」一嚿,如細心望望,就睇到由上而下,一共有5層:慕絲、海綿蛋糕、朱古力軟漿、慕絲、海綿蛋糕,全部以朱古力為主調,所以入口嘅朱古力味好濃郁,慕絲做得幼滑細緻,海綿蛋糕軟綿有回彈力,中層嘅軟漿柔滑香甜,喺甚高水準嘅出品。
bowl即磨咖啡
享受甜品,又豈可無杯咖啡配襯一下呢?餐飲就選上即磨咖啡,一杯芳香醇厚嘅咖啡,喺可以為甜點錦上添花。友人揀咗熱檸熱,喺為豐富嘅一餐消消滯。
餐廳唔止環境好,氣氛輕鬆,招呼又到位,又有好多配套。雖然喺酒吧餐廳,但大人細路都啱,怪唔之得見到近窗有一大班家庭客,就喺幫啲小朋友慶祝生日!今晚同朋友都傾咗好多,渡過咗一個非常愉快嘅晚上,唯可惜地鐵早收車,只可以搵日「嘉」時下半場再傾過。

個人評分
味道:9/10
環境:8/10
服務:9/10
抵食:8/10
平均每人消費:HK$365(75折)(試食活動)

餐廳資料:
嘉年華吧 Carnival Bar
沙田大涌橋路34-36號麗豪酒店1樓
2132 1280

沒有留言:

發佈留言